Qazaqstan ara sharýashylyǵy ónimderin eksporttaý áleýetin damytý jolynda mańyzdy qadam jasady: Shyǵys Qazaqstan oblysy, Glýbokoe aýdanynda ornalasqan «SUN-BEE ALTAI» JSHS elimizdegi alǵashqy ara sharýashylyǵy ónimi men bal óndirýshi kásiporyn retinde Eýropalyq Odaqtyń resmı tizilimine – Honey and other apiculture products establishments (HON) engizildi, dep habarlaıdy aqshamnews.kz.
Bul jetistik Qazaqstan Respýblıkasy Aýyl sharýashylyǵy mınıstrligi, Aýyl sharýashylyǵy mınıstrliginiń Veterınarıalyq baqylaý jáne qadaǵalaý komıteti jáne kásiporynnyń ózi tarapynan óndiristik úderisterdi Eýropalyq Odaqtyń veterınarıalyq-sanıtarıalyq talaptary men standarttaryna tolyq sáıkestendirý boıynsha kópjyldyq júıeli jumystyń nátıjesinde múmkin boldy.
Qazaqstannan baldy Eýropalyq Odaq elderine eksporttaý múmkindigi 2025 jylǵy 21 aqpandaǵy Eýropalyq komısıanyń qaýlysy jarıalanǵannan keıin, 2025 jylǵy 12 naýryzdan bastap resmı túrde ashyldy.
«SUN-BEE ALTAI» JSHS-niń HON tizilimine engizilýi kásiporynǵa Germanıa, Fransıa, Italıa, Belgıa, Nıderlandy, Avstrıa, Ispanıa, Polsha, Chehıa, Slovakıa, Slovenıa, Latvıa, Lıtva, Estonıa, Vengrıa, Fınlándıa, Shvesıa, Danıa, Portýgalıa, Grekıa, Bolgarıa, Rýmynıa, Horvatıa, Irlandıa, Kıpr, Lúksembýrg jáne Malta memleketterine eksport jasaý quqyǵyn beredi.
Komıtet aldaǵy ýaqytta da Qazaqstannyń ara sharýashylyǵy ónimderin eksporttaý áleýetin arttyrý maqsatynda eýropalyq naryqqa shyǵýǵa múddeli kásiporyndarǵa qoldaý kórsetip, tıisti ınspeksıalar júrgizýdi jalǵastyrady.