2025 jyly 3 mausymda Qazaqstanǵa jańa kerqūlandar toby ákelíndí. Būl — “Jabaıy jylqylardyń oraluy” jobasy ayasyndaǵy ekínshí halyqaralyq tasymal.
Jańa kerqūlandar toby Praga zooparkí men majar Hortobágy ūlttyq parkínen ákelíndí. 2 mausym kúní jetí jylqy tıelgen ekí áskerı ūshaq Chehıya men Majarstan elderínen ūshyp shyqty. Januarlar bír táulíkteı alys jol asyrdy, dep habarlaıdy aqshamnews.kz.
3 mausym kúní tań ata ekí ūshaq Arqalyq áuejaıyna kelíp qonyp, januarlar «Altyn Dala» memlekettík tabıǵı rezervatynyń aumaǵyndaǵy jabaıy tūyaqtylardy reıntroduktsıyalau ortalyǵyna taǵy 5 saǵat jol júrdí. Olar osyndaǵy keń qashalarda bír jyl ūstalady da, keıín jabaıy tabıǵatqa jíberíledí. Ortalyqta jylqylardy jaıǵastyratyn qajettí ınfraqūrylym men kútíp qaraıtyn mamandar bar.
«Qazaqstandaǵy bıoáraluandyqty saqtau jūmysynyń jetekshí organy retínde tabıǵatymyzdy qalpyna keltírudegí osyndaı mańyzdy kezeńdí basqaru — bíz úshín asqan qūrmet. Bír jyldyq jūmystyń keremet nátıjesí — ekínshí top kerqūlandar aman-esen kelíp jettí, al bírínshí top ábden kóndígíp, «Altyn Dala» memlekettík rezervatynyń ınspektorlarynyń qorǵauymen jabaıy tabıǵat tírshílígíne tolyq daıyn», — deıdí Qazaqstan Respublıkasy Ekologıya jáne tabıǵı resurstar mınıstrlígíníń Orman sharuashylyǵy jáne januarlar álemí komıtetíníń tóraǵasy Danıyar Tūrǵambaev.
«Osymen Praga zooparkíníń Chehıya áskerímen seríktestíkte kerqūlandardy Ortalyq Europadan Qazaqstanǵa ekínshí ret tasymaldauy. Europalyq zooparkíler men asyl tūqymdylardy ósíretín ortalyqtardan kelgen būl jylqylar jabaıy tabıǵatta jergílíktí populyatsıya qūruǵa negíz bolady. Tírshílíkke beıímdí árí genetıkalyq aluan túrlí populyatsıya qalyptaspaıynsha, aldaǵy jyldary osy kúrdelí jobany jalǵastyruǵa barynsha tyrysamyz», — deıdí Praga zooparkíníń dırektory Mıroslav Bobek.