Járdemaqy alýshylarǵa tólenetin aqsha kólemi ósedi.
Qazaqstan Úkimetiniń músheleri áleýmettik qoldaýdyń qosymsha sharalary týraly aıtty, dep habarlaıdy Almaty-akshamy.kz Eńbek mınıstrliginiń baspasóz qyzmetine silteme jasap.
Sáýir aıynan bastap Qazaqstandaǵy zeınetkerler men járdemaqy alýshylardyń tólemderi kóbeıetin bolady. Bul týraly Qazaqstannyń Eńbek jáne halyqty áleýmettik qorǵaý vıse-mınıstri Rýslan Sákeev Ortalyq komýnıkasıalar qyzmetinde ótken brıfıń barysynda aıtqan.
«Memlekettiń áleýmettik mindettemelerin oryndaý – Qazaqstannyń ishki saıasatynyń basty basymdyǵy. Álemdik ekonomıkadaǵy jańa jaǵdaılardyń eldegi áleýmettik-ekonomıkalyq jaǵdaıǵa teris áserin azaıtý maqsatynda búgin QR Parlamenti Senatynyń otyrysynda qaralyp jatqan búdjet jobasynda azamattardy áleýmettik qoldaýdy kúsheıtý úshin qosymsha 185 mlrd teńge bólindi. Bul qarajat zeınetaqylar, járdemaqylar men áleýmettik tólemderdiń mólsherin qosymsha 4%-ǵa ındeksteýge baǵyttalatyn bolady. Bul jıyntyǵynda 2021 jylǵy deńgeımen salystyrǵanda yntymaqty zeınetaqylar mólsheriniń 11%-ǵa, al bazalyq zeınetaqynyń jáne basqa da tólemderdiń 9%-ǵa ósýin qamtamasyz etedi. Nátıjesinde áleýmettik qamtamasyz etýge jáne halyqty jumyspen qamtýǵa járdemdesý sharalaryna arnalǵan shyǵystardyń jalpy kólemi 4.4 trln teńgeden nemese respýblıkalyq búdjet shyǵystarynyń tórtten bir bóliginen (25%) asady», – QR Eńbek jáne halyqty áleýmettik qorǵaý vıse-mınıstri Rýslan Sákeev Ortalyq komýnıkasıalar qyzmetinde ótken brıfıń barysynda.
Vıse-mınıstr búgingi tańda elimizdiń 4,2 mln azamaty túrli áleýmettik tólemderdi (zeınetaqy, memlekettik járdemaqy, memlekettik áleýmettik saqtandyrý qorynan tólenetin tólemder) alýshylar bolyp tabylatynyn atap ótti, onyń ishinde: 2,3 mln – zeınetkerler, 1,2 mln – bala tárbıelep otyrǵan otbasylar, 700 myńǵa jýyǵy – múgedektigi bar adamdar jáne azamattardyń basqa da sanattary bar.
«Zeınetaqylar men járdemaqylardy joǵary mólsherde tóleý sáýir men mamyr aılaryna qosymsha aqyny eskere otyryp, maýsym aıynda júzege asyrylatyn bolady», – dep túıindedi óz sózin vıse-mınıstr.