9 mamyr kúni merekelik is-sharalar kúni boıy aýdandyq ákimdikterdiń alańdarynda, saıabaqtarda, tipti, turǵyn úı aýlalarynda ótedi.
Almatyda merekege oraı 40-tan astam túrli is-sharalar ótedi. Jeńis kúniniń 77 jyldyǵyn merekeleýge shaharda daıyndyq jumystar qalaı júrgizilip jatqanyn Óńirlik komýnıkasıalar qyzmeti alańynda ótken brıfıń barysynda Almaty qalalyq ardagerler keńesiniń tóraǵasy Ahan Bıjanov aıtty, dep habarlaıdy Almaty-akshamy.kz.
Spıkerdiń aıtýynsha, bıyl Almatyda Jeńis kúni merekesi joǵary deńgeıde uıymdastyrylady. Onyń ústine, sońǵy eki jyl ishinde keń aýqymdy is-sharalar uıymdastyrylǵan joq. Soǵys ardagerleri men tyl ardagerleriniń bárine jergilikti bılik, sondaı-aq ardagerler tarapynan barynsha kóńil bólinedi.
Ahan Bıjanov Almatynyń ardagerlik qozǵalysy óskeleń urpaqty tárbıeleýde kóp ári mańyzdy ról atqaryp otyrǵanyn atap ótti. Sondyqtan da, Jeńis kúnine oraılastyrylǵan is-sharalardyń barlyǵy otansúıgishtikti tárbıeleýge jáne aǵa urpaqty qurmetteýge baǵyttalady.
Ardagerlerge kóńil bólip, qurmet kórsetý 9 mamyrǵa deıin bastalyp ketti. Almaty qalasy ákimdiginiń bastamasymen jáne máslıhattyń qoldaýymen soǵys ardagerlerine mıllıon teńgeden birjolǵy járdemaqy tólenýde. Sonymen qatar, Uly Otan soǵysy ardagerlerine jáne basqa memleketterdiń aýmaǵyndaǵy soǵys qımyldaryna qatysqan ardagerlerge teńestirilgen jeńildikterge birjolǵy áleýmettik kómek kórsetildi.
«Qazirdiń ózinde qalada merekelik atmosfera seziledi, soǵys qaharmandarynyń portretteri beınelengen 40 bılbord ornatyldy, qalanyń barlyq BAQ taqtalarynda jáne metro stansıalarynda 9 mamyr taqyrybyna arnalǵan beınerolıkter jarıalandy. 20 myń dana «Jeńis lentasy» daıyndalyp, qala turǵyndaryna taratylatyn bolady», - dedi ardagerler qozǵalysynyń tóraǵasy.
Lentalardy saýda jáne oıyn-saýyq ortalyqtarynan, 28 gvardıashy-panfılovshylar saıabaǵyna, Ortalyq mádenıet jáne demalys saıabaǵyna barǵan kezde alýǵa bolady.
Aıta ketý kerek, merekelik bezendirýden bólek, aýdan ákimdikteri ardagerler men barsha jergilikti turǵyndarǵa merekelik konsertter beredi.
Negizgi baǵdarlama 9 mamyr kúni saǵat 9.30-da bastalady. Bıylǵy jyly «Batyrlarǵa taǵzym» aksıasy uıymdastyrylyp, onyń aıasynda qala turǵyndary Gorkıı atyndaǵy OMjDS-nan Gogol kóshesiniń boıyndaǵy 28 gvardıashy-panfılovshylar saıabaǵyna deıin baryp, soǵysta qaza tapqan batyrlardy eske alyp, gúl shoqtaryn qoıady.
Gúl shoqtaryn qoıǵannan keıin qazaq estrada juldyzdarynyń qatysýymen konsert ótedi. Shara barysynda soǵys ardagerleri men tyl eńbekkerlerine de merekelik dastarhan uıymdastyrylady.
Mereke ótetin jerde áskerı shatyrlar men palatkalar ornalastyrylyp, zamanaýı qazaqstandyq áskerı tehnıka men qarý-jaraq qoıylady.
Sondaı-aq Ahan Bıjanov bıylǵy jyly qala ákimi, onyń orynbasarlary, aýdan ákimderi men máslıhat depýtattary ardagerlerdi aralap, árqaısysymen jeke kezdesýler ótkizetinin aıtty.
Merekelik sharalar kúni boıy aýdan ákimdikteri janyndaǵy alańdar men saıabaqtarda, tipti turǵyn úılerdiń aýlalarynda da ótedi.