Temirjol jol aqysy 24,7%-ǵa, taksı aqysy 12,2%-ǵa ósken
QR Ulttyq bankiniń dereginshe, 2023 jyldyń qańtar aıyndaǵy aılyq ınflásıa 1,1%-dy qurap, tutyný taýarlary men qyzmet baǵasynyń jyldyq ósýi 20,7%-ǵa deıin qarqyn aldy, dep habarlaıdy Almaty-akshamy.kz Azattyq Ruhy-na silteme jasap.
Bas bank azyq-túlik taýarlarynyń arasynda nan-toqash ónimderi men jarmaǵa, sonyń ishinde Reseı tarapynan týyndaǵan suranystyń artýyna baılanysty kúrish baǵasy úzdiksiz óskenin habarlady.
«2023 jylǵy qańtarda azyq-túlik taýarlarynyń jyldyq ınflásıasy 25,7%-ǵa deıin jedeldedi (2022 jylǵy jeltoqsanda – 25,3%). Nan-toqash ónimderi men jarma baǵasy da tez ósti. Reseı tarapynan joǵary suranys paıda bolyp, kúrishtiń 39,6%-ǵa qymbattaǵany sezildi», - deligen QR Ulttyq bankiniń dereginde.
Eldiń ońtústik aımaqtaryndaǵy tómen temperatýra men eginniń bir bóligi joǵalǵandyqtan jańa pisken kókónister 2022 jyldyń qazan aıynda 7,1%-dan 2023 jyldyń qańtarynda 21%-ǵa deıin, atap aıtqanda, qıar (22,3%-dan 55,6%-ǵa deıin) jáne pıaz (13,6%-dan 62,4%-ǵa deıin) aıtarlyqtaı qymbattaǵan.
Birinshi suryptaǵy jumyrtqa baǵasyn sýbsıdıalaý toqtatylǵannan keıin baǵanyń jyldyq ósý qarqyny 2022 jylǵy tamyzdaǵy 7,9%-dan 2023 jylǵy qańtarda 25,8%-ǵa deıin ósken. Al ishki qant óndirisiniń aıtarlyqtaı ósýine baılanysty besinshi aı qatarynan arzandap keledi.
Sondaı-aq ımporttyq úlesi joǵary taýarlar da qymbattap otyr. Tasymal tarıfi óskendikten kómirdiń baǵasy sharyqtady. Suranys artyp, qosalqy bólshekter qymbattaǵandyqtan avtomobılderdiń de quny ósti dep túsindirdi bas bank.
«Importtyq taýarlar tobynda aıaq kıim men kıimniń (18,2%), úı toqyma buıymdarynyń (16,4%), jýý jáne tazalyq quraldarynyń (51,5%), qurylys materıaldarynyń (25,7%) jáne dári-dármektiń (15,6%) qymbattaǵany baıqaldy. Sonymen qatar, Reseı naryǵynan negizgi óndirýshilerdiń ketýine jáne logıstıkalyq jetkizý tizbeginiń buzylýyna baılanysty Reseıden oryndalatyn jetkizilimderdiń sany qysqaryp, bir jyldan astam ýaqyt boıy jeke taýarlardyń baǵasy ósýin jedeldetti», - deligen Ulttyq banktiń esebinde.
Aqyly qyzmetter qurylymynda ınternet úshin abonenttik tólem, sondaı-aq avtomobıl men temirjolda jol júrý aqysy ósti. Máselen, temirjol jol aqysy 24,7%-ǵa, taksı aqysy 12,2%-ǵa ósken.