Búgin – Keńes áskeriniń Aýǵanstan jerinen shyǵarylǵanyna 34 jyl. Resmı derek kózderine súıensek, aýǵan soǵysyna 22 296 qazaqstandyq qatysty. Onyń 928-i qaza taýyp, myńdaǵan jigit múgedek bolyp oraldy. Al 19-y iz-túzsiz joǵalyp ketken. Bes jerlesimiz Keńes Odaǵynyń Batyry, bireýi Halyq qaharmany, ekeýi «Aıbyn» ordeniniń ıegeri atandy. Myńdaǵan jigit Táýelsiz Qazaqstannyń nagradalarymen marapattaldy. Biraq olar kezinde soǵysqa «biz nagrada alýymyz kerek, batyr bolamyz» dep emes, patrıottyq rýhpen, jastyqtyń jalynymen attanǵan balań jigitter edi. Sol jastardyń qatarynda 18 jastaǵy bozbala Áýez de bolǵan.
Áýez Beısenbaev ásker qataryna Almaty qalasy Oktábr aýdandyq áskerı bólimshesinen alynyp, Máskeýge kelip, sol jerden Taman dıvızıasynyń quramynda áskerı qyzmetin bastaǵan. RP-3 jyljymaly barlaýshy pýnktine túsedi. Barlaý qyzmetine jańa áskerı tehnıka berilip, lazerlik nysana, lazerlik qondyrǵy, EVM-kompúter degen de sol kezde boldy. Sý jańa áskerı tehnıkanyń tilin bilikti komandırdiń arqasynda Áýez de birden meńgerip alady. Zamanaýı tehnıkany soǵys synaǵynan ótkizý qajet bolǵandyqtan, birneshe jaýynger tehnıkamen birge aýǵan jerine attanady. Synaqtan ótken soń tehnıkany alyp ketedi de, Áýez aýǵan jerinde Gerat provınsıasynda barlaýshy bolyp qalyp qoıady. Barlaýshylyqqa ádette sergek, zerek, tyńǵylyqty, suńǵyla, saq jigitterdi alatyny belgili. Olardyń qyzmettik tapsyrmalaryn tek basshylyq qana bilip otyrady, al qalǵan jerlerde syr aldyrmaýǵa tıis. Ýyzdaı jap-jas qazaq jigitteri oq pen ot boraǵan aýǵan jerinde kópke jarıa qylmaı-aq talaı qupıa tapsyrmany oryndap, kózsiz erlikter jasady. Sol mańyzdy tapsyrmalardyń aldyńǵy shebinde júrgen Áýez Túlmahanuly aýǵan shekarasynan 1989 jyly 15 aqpanda Keńestiń sońǵy áskeri shyǵarylǵansha Otan aldyndaǵy boryshyn adal atqardy.
– Maıdanda dostyqqa adaldyq, beriktik degen uǵymdardy tereń túsindik desem, qatelespespin. Dostyqqa berik bolý aýǵan soǵysyna qatysqan jaýyngerdiń jadyndaǵy sert bolyp qalyptasty. Jat elde aýyldy saǵynasyń, týǵan jerdiń aýasyn ańsaısyń. Oń-solymyzdy endi tanyp kele jatqan jas bozbala shaqta taǵdyrymyz bir buıryqpen sheshilip, erte eseıdik, taǵdyrdyń ótinde turyp, shyńdaldyq. Boıymyzdy úreı bılegen kúnder men túnder de boldy, sonyń bári biz úshin úlken ómir mektebine aınaldy. Bizdi «ardager» dep jatady. Men úshin bul sózdiń maǵynasy tereńde jatyr. Ol «arly er» nemese «ardaqty er» degen uǵymdy bildiredi. Jalpy, ardager dep bizdi emes, bizdiń erlik isimizdi, qoǵamǵa tıgizgen kómegimizdi, Otan úshin otqa túsýge daıyn bolǵan jastyq shaǵymyzdy, el basyna kún týǵan syndarly sátterde jastyǵymyzǵa qaramaı batyl qımyl jasaı alǵan áreketterimizdi baǵalaǵany, halyqtyń baǵasy dep bilemin. Iá, elim bizdi ardager dep tanysa, bul qurmet dep tanımyn. Baýyrjan atamyz «Adam bolý – qasıet, azamat bolý – mindet, patrıot bolý – paryz» dep jaqsy aıtyp ketken. Eshqashan tizemizdi jaý aldynda búkken emespiz. Meniń oıymsha, munyń barlyǵy Otanymyzǵa degen júregimizden shyqqan qurmet dep esepteımin. Al eń bastysy – biz kórgen soǵysty keleshek urpaq kórmese eken degen tilegimiz bar, – deıdi Almaty qalasyndaǵy «Kókbaıraq» aýǵan soǵysy múgedekteri men ardagerleri qoǵamdyq birlestiginiń tóraǵasy Áýez Beısenbaev.
Laıym solaı bolǵaı!