Kóktemgi egis aıaqtalǵannan keıin ǵana jóndeýge jabylýy kerek.
QR Energetıka mınıstri Bolat Aqsholaqov eldegi munaı óńdeý zaýyttaryn jóndeý jumystarynyń eginshiler úshin mańyzdy naýqanmen qatar kelmeýine kúsh salynyp jatqanyn aıtty, dep habarlaıdy Almaty-akshamy.kz QazAqparatqa silteme jasap.
«Munaı óńdeý zaýytttarynyń jóndeý merzimin aýylsharýashylyq taýar óndirýshilerge dızel otynyn jóneltý kezeńimen úılestirý baǵytynda mynadaı sharalardy qolǵa almaqshymyz. Aýylsharýashylyq taýar óndirýshilerdiń qajettiligine kerek dızeldik otyndy jóneltý 2022 jyldyń aqpan aıynan bastalady. Bul kóbinese ońtústik óńirlerge qatysty. Jyl saıyn bul maqsatqa 800-850 myń tonna bólý josparlanǵan. Bul eki maýsymǵa degen sóz. Iaǵnı, egis jáne oraq naýqanyna baǵyttalady», - dedi mınıstr.
Sondaı-aq ol bıyl jóndeýden ótetin eki zaýyttyń jóndeý merzimi shegeriletinin eskertti.
«Shymkenttegi munaı óńdeý zaýytynyń jóndeý merzimin 2022 jyldyń qarashasynan 2023 jylǵa jyljytý máselesi boıynsha jumys júrip jatyr. Al Pavlodardaǵy zaýytty jóndeý merzimin bıylǵy maýsym aıynan shildeniń ortasyna jyljytý kózdelip otyr. Iaǵnı, jóndeý jumystary kóktemgi egis aıaqtalǵannan keıin ǵana jóndeýge jabylýy kerek», - dedi Bolat Aqsholaqov.