Mekeme basshylyǵy quqyq qorǵaýshylardyń nátıjeli jumys isteýine qolaıly jaǵdaı jasaýda.
Quqyq qorǵaýshylar qańtar oqıǵasyna qatysty qamalǵandarmen kezdesti, dep habarlaıdy Almaty-akshamy.kz Polisia.kz saıtyna silteme jasap.
Qańtar oqıǵasy kezindegi jappaı tártipsizdikterden keıin Almaty qalasy boıynsha QAJD-ǵa qarasty tergeý ızolátoryna jetkizilgender sany kúrt óskeni belgili. Osyǵan oraı atalǵan mekemege quqyq qorǵaýshylardyń kelip, kúdiktilerden jaýap alýy jáne adam quqyǵyn qorǵaý jónindegi qoǵamdyq uıym ókilderiniń kúdiktilerdi ustaý jaǵdaıyn qadaǵalaýy jıiledi. Osyǵan oraı QAJ departamenti men mekeme basshylyǵy quqyq qorǵaýshylardyń nátıjeli jumys isteýine qolaıly jaǵdaı jasaýda.
Atap aıtqanda, Almaty qalasy boıynsha QAJ departamentiniń LA-155/18 mekemesine Qazaqstan Respýblıkasyndaǵy Adam quqyqtary jónindegi ýákil Elvıra Azımova, «Adam quqyǵyna arnalǵan hartıa» qoǵamdyq qorynyń dırektory Jemis Turmaǵambetova kelip, ustalǵandarmen jan-jaqty áńgime ótkizdi. Tergeý ızolátoryna jetkizilgenderdiń arasynda kámelettik jasqa tolmaǵan jasóspirimniń bolýyna oraı Qazaqstan Respýblıkasyndaǵy Bala quqyqtary jónindegi ýákil Arýjan Saınnyń nusqaýymen jasóspirimniń jaǵdaıyn bilýge quramynda Qazaqstannyń azaptaýǵa qarsy Úkimettik emes uıymdar koalısıasynyń úılestirýshisi, Adam quqyqtary jáne zańdylyqty saqtaý jónindegi Qazaqstan halyqaralyq búrosy dırektorynyń orynbasary, QR Adam quqyqtary jónindegi ýákil janyndaǵy Azaptaýdyń aldyn alý UAT úılestirý keńesiniń múshesi Roza Aqylbekova, UAT múshesi, Pedıatrıa jáne balalar hırýrgıasy ǵylymı ortalyǵynyń anestezıolog-reanımatolog dárigeri Gúljan Teıpqyzy jáne «Qazaqstandaǵy daǵdarys ortalyqtary odaǵynyń» tóraǵasy, QR Adam quqyqtary jónindegi ýákil janyndaǵy azaptaýǵa qarsy UAT Úılestirý keńesiniń múshesi Zýlfıa Baısaqova bar sarapshylar toby kelip, tergeý qamaýyndaǵy jasóspirimdi ustaý jaǵdaıymen tanysty.
Sondaı-aq, LA-155/18 mekemesindegi tergeý qamaýyndaǵylardyń jaǵdaıy qoǵamdyq baqylaý komısıasy ókilderiniń de jiti nazarynda. Mekemege Almaty qalasy jáne Almaty oblysy boıynsha qoǵamdyq baqylaý komısıasynyń tóraıymy Ardaq Janábilova kelip, tutqyndarmen betpe-bet áńgimelesti. Quqyq qorǵaýshylar tergeý ızolátorynyń medısına-sanıtarlyq bóliminde em alyp jatqan jaraly kúdiktilermen de kezdesti.
Búginde qańtardaǵy qaqtyǵys kezinde qamaýǵa alynǵandarǵa kómektesý maqsatynda qurylǵan «Amanat» qorynyń ókilderi men quramynda belgili quqyq qorǵaýshylar, qylmystyq is júrgizý quqyǵy boıynsha mamandanǵan zańgerler bar táýelsiz komısıa músheleri tergeý ızolátoryna qamalǵan kúdiktilerge jan-jaqty quqyqtyq kómek kórsetýde.