Barlyq qońyraýlar jasyryn túrde qabyldanady.
Azamattyq bastamalardy qoldaý ortalyǵyndaǵy sybaılas jemqorlyqqa qatysty quqyq buzýshylyq máseleleri boıynsha senim telefonynyń nómirine úkimettik emes uıymdardyń ókilderi de, konkýrs jeńimpazdaryn anyqtaıtyn saraptama komısıasynyń músheleri de óz shaǵymdaryn túsire alady, dep habarlaıdy Almaty-akshamy.kz Ortalyqtyń baspasóz qyzmetine silteme jasap.
Azamattyq bastamalardy qoldaý ortalyǵynda ÚEU-ǵa memlekettik granttardy usyný jónindegi konkýrstyq komısıanyń quramyndaǵy sarapshylardyń quqyqtary men mindetterin túsindirýge arnalǵan onlaın-kezdesý ótti.
İs-sharaǵa sarapshylar, QR Aqparat jáne qoǵamdyq damý mınıstrliginiń, «Adaldyq alańy» jobalyq keńsesiniń jáne Azamattyq bastamalardy qoldaý ortalyǵynyń ókilderi qatysty.
Azamattyq bastamalardy qoldaý ortalyǵynyń basqarma tóraıymy Lıma Dıastyń aıtýynsha, Ortalyq ÚEU-ǵa memlekettik granttar usyný konkýrsynyń jeńimpazdaryn anyqtaıtyn saraptamalyq komısıa músheleriniń quzyretin arttyrý máselelerine erekshe kóńil bóledi.
«Biz saraptamalyq komısıa músheleriniń jumysy jaýapkershilikti, arnaıy bilim men daǵdylardy talap etetinin túsinemiz. Sonymen qatar, bıyl baıqaý komısıasynyń quramyna alǵash kirgen sarapshylar da bar. Olardyń quzyrettiligin arttyrý maqsatynda jyl boıy biz trenıńterdi, semınarlardy ótkizip, ÚEU-nyń ótinimderin baǵalaý rásimderin túsindiretin bolamyz», - dep atap ótti Ortalyqtyń tóraıymy.
Sondaı-aq, Lıma Dıastyń málimetterine súıensek, úkimettik emes uıymdardyń ótinimderin qaraý kezinde sybaılas jemqorlyq faktilerine jol bermeý maqsatynda Ortalyqta Sybaılas jemqorlyqqa qarsy kompleans-qyzmettiń jumysy jandandyrylǵan.
«Búgin biz ortalyqtyń Sybaılas jemqorlyqqa qarsy kompleans-qyzmetiniń jumysyn kúsheıtýdemiz. Bizde senim telefony jumys isteıdi. 8 771 348 83 84 nómiri arqyly ótinishter men shaǵymdardy saraptama komısıasynyń músheleri de, ótinish berýshiler de jibere alady. ÚEU ókilderi óz quqyqtary buzylǵan jaǵdaıda saraptama komısıasyna shaǵymdansa, sarapshylar ótinish berýshige ózderine qysym jasaǵany úshin bizge habarlasa alady. Barlyq qońyraýlar jasyryn túrde qabyldanady», - dedi ol.
Eske salaıyq, ótken aptada Azamattyq bastamalardy qoldaý ortalyǵynda ÚEU-ǵa memlekettik granttardy usyný jónindegi 2022 jylǵy konkýrstyń saraptamalyq komısıasyn qurý rásimi ótkizilgen bolatyn.