Eldegi avtokólik sany 3,9 mıllıonnan 5 mıllıonǵa deıin ósti.
Qazaqstannyń İshki ister mınıstri Marat Ahmetjanov kólikti tehnıkalyq tekserý operatorlarynyń jaýapkershiligin kúsheıtýdi usyndy, dep habarlaıdy Almaty-akshamy.kz QazAqparatqa silteme jasap.
Óz sózinde mınıstr eldegi avtoparktiń artyp kele jatqanyn aıtty.
«2019 jyldan bastap avtokólik sany 3,9 mıllıonnan 5 mıllıonǵa deıin ósti. Onyń ishinde sheteldik tirkeýdegi kólikter de bar. Buǵan qosa, avtopark eskirip jatyr. Elimizdegi 50% paıyzdan astam kólikterdiń paıdalaný merzimi 20 jyldan asyp ketken. Iaǵnı, tozyǵy jetken», - dedi İshki ister mınıstri Úkimettiń búgingi otyrysynda.
Sonymen birge, Marat Ahmetjanov avtokólikterdiń tehnıkalyq jaǵdaıyna tıisti baqylaý júrgizilmeıtinin aıtty.
«Ózderińiz bilesizder, tehnıkalyq tekserý ortalyqtaryn ashýǵa qoıylatyn talaptar tómendetildi. 2016 jyly olardy ashý tártibi lısenzıalaýdan habarlama túrine ózgerdi. 2018 jyly bul qyzmetke ruqsat berý baqylaýy joıyldy. Bul jaǵdaı kólikti tehnıkalyq baıqaýdan jalǵan ótkizip, talondar berý praktıkasyna ákep soqty. Byltyr Sybaılas jemqorlyqqa qarsy qyzmet osyndaı 350 myń jalǵan qujat jasap, 600 mln teńge zańsyz tabys tapqan uıymdasqan qylmystyq topty ustady», - dedi vedomstvo basshysy.
Oǵan qosa, sońǵy 4 jylda tehnıkalyq jaıdaıǵa baılanysty baıqaýdan ótpeı qalǵan kólikterdiń sany eki esege azaıǵan.
«Bul árıne, úlken kúmán týdyrady. Óıtkeni kólikterdiń tehnıkalyq reglament talaptaryna saı kelmeýine baılanysty 106 myń júrgizýshi jaýapqa tartylǵan. Sondaı-aq, tehnıkalyq baıqaýdan ótpegen 80 myń júrgizýshige aıyppul salyndy. Kezinde bul fýnksıa kásipkerlik salasyna berilgen bolatyn. Biraq, prosedýrany jeńildetemiz dep, kóptegen teris saldarǵa jol berdik. Jol apattary kóbeıip, jemqorlyq artty. Osyǵan baılanysty, Indýstrıa mınıstrligine avtokólikti jalǵan tekserý faktileri úshin tehnıkalyq baıqaý operatorlarynyń jaýapkershiligin kúsheıtýdi usynamyz», - dedi Marat Ahmetjanov.