Elimizdiń batysynda Parasat Nurǵalıev esimdi alyp azamat bar.
Onyń boıy 2 metr 15 santımetr, al salmaǵy 150 kılogramm, aıaq kıim ólshemi 56, dep habarlaıdy Almaty-akshamy.kz
Jaqynda 27 jasqa tolatyn Parasat - otbasynyń kenjesi.
Atyraýdyń alyp azamaty týraly jazǵan «Aq Jaıyq» portalynyń málimetinshe, onyń mektep bitirerdegi salmaǵy 120 kılogramm, boıy 2 metr bolǵan.
Ózgelerden dene bitimi erekshe, alyp tulǵaly Parasat Nurǵalıev Inder aýdany Jarsýat okrýgine qarasty Qurylys aýylynda turady.
Parasattyń erekshe dene bitimi oǵan kıim tabýda qıyndyq týdyryp keledi. Sondyqtan ol kóbine tiginshiniń qyzmetine júginýge májbúr. Jyly maýsymda aıaǵyna súıretpe rezeńke aıaq kıim kıgenimen, kún salqyndaǵan kezde shaq keletin aıaq kıim tappaı, úıden shyǵa almaı qalǵan kezderi de bolǵan. Sondyqtan aýyldastary oǵan kómektesýge bel býyp, aıaǵynyń ólshemine saı aıaq kıimge tapsyrys bergen.
«Qazaqtyń alyby Qajymuqan atamyzdyń aıaq kıiminiń ólshemi 54 bolypty. Al Parasattyń aıaǵy odan da úlken. Oǵan shaq keler aıaq kıimdi tiktirý úshin birtalaı jerge habarlastym, biraz tiginshimen sóılestim. Aıaǵynyń úlkendigin bilgen soń bári bas tartady. Sóıtip, qınalyp júrgenimde, Almatydan tiginshi Valerıı Voronın ǵana kelisim berdi. Ol sheber 40 jyldyq kásibinde 49-shy ólshemnen artyq aıaq kıim tikpegen eken», - deıdi Parasattyń aýyldasy Baıǵalı Ótemanov.
Onyń aıtýynsha, tiginshi bul usynysqa qyzyǵýshylyq tanytyp, mundaı ólshemdegi qalyby joqtyǵyna qaramastan, Parasatqa arnap aıaq kıim tigýge ýáde bergen. Osylaısha Voronın ýádesin oryndap, 52-shi ólshemdi qalypty úlkeıtip, 20 kúnniń aınalasynda 200 myń teńgege aıaq kıim tigip bergen.
Parasat 2014 jyly Qurylys orta mektebin bitirip, Atyraýdaǵy oqý ornynda temir pisirýshi mamandyǵyn ıgergen.
«Ákem Serikqalı qaıtys bolǵan, anam Qońyrsha ekeýmiz birge turamyz. Anamnyń aıtýynsha, dúnıege kelgende salmaǵym úlken bolmaǵan. Al ájem Áýez asa etjeńdi bolmaǵanymen, súıekti, iri bolǵan. Ákem de jaýyryndy, deneli edi, qolynyń ózi dáý bolatyn. Meni kórgender ákeńe tartqansyń deıdi. Al aǵalarym mendeı emes, boılary ortasha», - deıdi Parasat.
Ol dene bitimindegi ózgeristi mektepte júrgen kezde baıqaǵanyn aıtty.
«Basqa balalar sıaqty bolǵanymmen, 6-synypta oqyp júrgende denemdegi erekshelikti baıqaı bastadym. Birtúrli súıekterim óse bastaǵandaı sezilip, aıaqtarym uıyp, túsiniksiz sezimde boldym. Kıimderim kishkentaı bola bastady, boıym tez ósip, aıaǵym úlkeıip ketti. 9-10-shy synyp oqyp júrgenimde, aıaq kıim tabý problema boldy. Sebebi aıaq kıim ólshemi 50-ge jetti. Al ondaı aıaqkıim tabý óte qıynǵa soqty. Mektepti bitirerde salmaǵym 120 kılogramm, al boıym 2 metrge jetti», - deıdi ol.
Biraq, dene bitiminiń ereksheligi Parasattyń densaýlyǵynda esh kinarat týdyrmaǵan. Qazir ol aýyl arasyndaǵy qurylys jumystarymen aınalysyp júr, turaqty jumysy joq.
«Mende turaqty jumys joq, kóbine úılerdiń irgetasyna laı quıý, sylaq sylaý sekildi jumystarmen aınalysamyn. Jumystan sharshamaımyn, qazir tórt adam bolyp úıdiń irgetasyn quıyp jatyrmyz. Óz mamandyǵymmen jumys jasaǵan emespin», - deıdi Parasat.