Qarjy naryǵyn retteý jáne damytý agenttigi (QNRDA) saqtandyrý zańnamasyna úlken ózgerister paketin ázirledi. Bul ózgerister, onyń ishinde, uqypsyz júrgizýshilerge saqtandyrý erejelerin qatańdatýdy kózdeıdi, dep habarlaıdy aqshamnews.kz.
Ózgerister jobasy «Ashyq NQA» portalynda ornalastyrylǵan. Qoǵamdyq talqylaý 4 qarashaǵa deıin jalǵasady. Zań jobasynyń negizgi normalary avtosaqtandyrýǵa qatysty. QNRDA qujattyń túsindirmesinde saqtandyrý syılyqaqylaryn esepteý úshin «bonýs-malýs» júıesin jetildirýdi maqsat etip otyrǵanyn atap ótken.
Joba boıynsha, jol erejelerin buzǵan júrgizýshilerdi tártipke ashqyrý etý kózdelgen. Olar saqtandyrý úshin kóp tóleýge májbúr bolady, al saqtandyrý jaǵdaılary boıynsha tólemder azaıady.
Jyldamdyqty asyrý, qarsy jolǵa shyǵý, baǵdarshamǵa baǵynbaý, apattyq jaǵdaı jasaý, aqaýly kólikpen júrý – osy tárizdi erejelerdi buzǵany úshin júrgizýshilerdiń saqtandyrý synyby tómendeıdi. Eger júrgizýshi úsh nemese odan kóp osyndaı quqyq buzýshylyq jasaǵan jaǵdaıda, onyń saqtandyrý synyby ádepki deńgeıden bir satyǵa tómendeıdi.
Eń tómengi saqtandyrý synyby – M2. Bul synypty myna jaǵdaılarda alatyn júrgizýshilerge taǵaıyndaıdy:
- mas kúıinde kólik basqarǵan (sonyń ishinde birneshe ret);
- mas kúıinde apatqa ushyraǵan;
- jol-kólik oqıǵasynda adam qaza taýyp nemese múgedek bolǵan.
Eger joǵary saqtandyrý synybyna ıe júrgizýshi óz kinásinen adam ólimimen aıaqtalǵan jol apatyn jasasa, onyń saqtandyrý synyby dereý M2-ge tómendeıdi.
Barlyǵy zań jobasynda 18 saqtandyrý synyby qarastyrylǵan. Tómengi synyptar – jol erejesin jıi buzatyn júrgizýshiler úshin: M2, M1 jáne M, odan keıin nóldik synyp, A synyby jáne 13 negizgi synyp keledi. Synyp neǵurlym tómen bolsa, saqtandyrý úshin soǵurlym kóp tóleýge týra keledi. Ár synyp boıynsha saqtandyrý sharttarymen tolyǵyraq tanysýǵa bolady.