Almatyda «Jarqyn kúz» aksıasy – «Almaty – bizdiń ortaq úıimiz» atty kúzgi ekologıalyq naýqan aıasynda iri kólemdi qoqysty belgilenbegen oryndarǵa durys tastamaý faktileri boıynsha abattandyrý erejelerin buzýshylardy anyqtaý jumystary kúsheıtildi, dep habarlaıdy aqshamnews.kz.
Aı basynan beri Almaty qalasynyń Ekologıa jáne qorshaǵan orta basqarmasy qyzmetkerleri Polısıa departamentimen birlesip júrgizgen reıdtik is-sharalar barysynda 20-dan astam ereje buzýshy anyqtalyp, olarǵa qatysty Ákimshilik quqyq buzýshylyq týraly QR Kodeksiniń 505-babyna sáıkes 10-20 AEK kóleminde aıyppul salynǵan ákimshilik hattamalar toltyryldy.
Aıta ketý kerek, Almaty qalasynyń abattandyrý erejelerine sáıkes kásiporyndar, mekemeler jáne jeke tulǵalar iri kólemdi qoqysty ózderi shyǵaryp nemese qoqys shyǵaratyn uıymdarmen kelisimshart jasasýy tıis.
Jóndeý júrgizip jatqan nemese iri kólemdi qoqysy bar turǵyndar qoqysty shyǵarý úshin arnaıy uıymdarǵa júginýi nemese qoqysty Almaty oblysynyń İle (Almaty-Óskemen tas joly, 34/1 https://go.2gis.com/5wg4xn) jáne Qarasaı (Aıteı aýyly, 144-eseptik kvartal, 4690 https://2gis.kz/almaty/geo/70000001051600536) aýdandarynda ornalasqan polıgondarǵa ózderi jetkizýi qajet.
Esterińizge sala keteıik, 2024-2025 jyldary Almaty qalasynda sanıtarlyq jaǵdaıdy jaqsartý maqsatynda 786 eski konteınerdi aýystyrý jáne 2000-nan astam jańa tereńdetilgen konteıner ornatý josparlanýda. Bul konteınerler qoqys jáshikteri alatyn aýmaqty azaıtýǵa, jaǵymsyz ıisterdiń taralýyn boldyrmaýǵa jáne janýarlardyń qoqysqa qol jetkizýin shekteýge múmkindik beredi.
Eske salsaq, buǵan deıin Almatyda konteınerlik alańdardy sanıtarlyq óńdeý jumystary kúsheıtilgeni jaıynda jazǵan edik.