Almatyda jetim balalardy otbasyna ornalastyrý júıesin damytý boıynsha belsendi jumys jalǵasýda.
2016 jyldan beri jumys istep kele jatqan «Ulttyq asyrap alý agenttigi» jobasy aıasynda qabyldaýshy otbasylarǵa qajetti qoldaý men keńester beriledi, dep habarlaıdy aqshamnews.kz.
Bul týraly «Ulttyq asyrap alý agenttiginiń» jobalyq jetekshisi Farıda Rahmetova Óńirlik komýnıkasıalar qyzmetiniń baspasóz konferensıasynda aıtty.
«Ulttyq asyrap alý agenttigi qabyldaýshy otbasylardy kásibı daıarlaý jáne qoldaý jumystarymen aınalysady. Bizdiń basty maqsatymyz – ata-anasynyń qamqorlyǵynsyz qalǵan árbir balaǵa otbasynda ómir súrýge múmkindik berý», – dep atap ótti Farıda Rahmetova.
2016 jyldan bastap 18 248 azamat konsýltasıadan ótti, olardyń 6 172-si Qabyldaýshy ata-analar mektebinde arnaıy daıyndyqtan ótken. Nátıjesinde 1 988 bala óz otbasyn taýyp, 1 335 qazaqstandyq otbasy olardy qamqorlyǵyna aldy. Almaty boıynsha bul kórsetkishter kelesideı: 2 285 adam keńes alǵan, 818 adam arnaıy oqytylǵan, 158 bala jańa otbasyna ornalastyrylǵan.
Jańa format – kásibı qabyldaýshy otbasylardy engizýge erekshe nazar aýdarylýda. Dástúrli qabyldaýshy otbasylardan aıyrmashylyǵy, fosterlik ata-analar tereńdetilgen daıarlyqtan ótip, kásibı deńgeıde jumys isteıdi. Olardyń qyzmeti jańa zańnamamen retteledi jáne memleket tarapynan qarjylaı qoldaý qarastyrylǵan.
«Qabyldaýshy kásibı ata-analar ártúrli dıagnostıkadan ótip, psıhologıalyq daıyndyqtan jáne oqytýdan ótedi. Biz bul otbasylardy bala tárbıeleý barysynda tolyq qoldap, týyndaýy múmkin qıyndyqtardyń aldyn alý úshin júıeli túrde baqylaý júrgizemiz», – dep túsindirdi «Ana úıi» qorynyń psıholog qyzmetiniń jetekshisi Laýra Akataeva.
Óz kezeginde Farıda Rahmetova kásibı qabyldaýshy otbasylarǵa qarjylyq qoldaý ár ata-anaǵa 70 AEK jáne balany asyraýǵa 10 AEK quraıtynyn atap ótti. Sonymen qatar, bul júıe qorǵanshylyq jáne qamqorshylyq organdary tarapynan turaqty baqylaýdy kózdeıdi. Ata-analar ár jarty jyl saıyn balanyń densaýlyǵy men damýy týraly esep berýge mindetteledi, al mamandar bul otbasylarmen tyǵyz jumys isteýdi jalǵastyrady.