Almaty jastar saıasaty salasynda halyqaralyq baılanystardy nyǵaıtýǵa erekshe kóńil bólýde.
Osy maqsatta ońtústik astanaǵa Qyrǵyz Respýblıkasynyń jastar delegasıasy arnaıy saparmen keldi. Delegasıa quramynda Qyrǵyz parlamentiniń, Mádenıet mınıstrliginiń jáne jastar saıasatyna jaýapty qurylymdardyń ókilderi bar, dep habarlaıdy aqshamnews.kz.
Qonaqtar eń aldymen Alataý hab kitaphanalar jelisinde bolyp, onyń qyzmetimen tanysty. Sondaı-aq Ál-Farabı atyndaǵy Qazaq ulttyq ýnıversıtetiniń túrkitanýshy ǵalymy Nurat İlıas qazaq-qyrǵyz halyqtarynyń ortaq tarıhy men bolashaǵy jaıynda mazmundy baıandama jasady.
Óz kezeginde Almaty qalasy Jastar saıasaty basqarmasynyń bólim basshysy Nursultan Bekqaırov basqarmanyń negizgi qyzmet baǵyttary týraly aıtyp, komúnıtı ortalyqtarynyń jumysyn tanystyrdy.
Almatydaǵy komúnıtı ortalyqtary – jastar saıasatynyń mańyzdy bóligi. Bul ortalyqtar jas kásipkerlerdi, eriktilerdi, kreatıvti ındýstrıa ókilderi men belsendi jastardy biriktirip, olardyń damýyna qoldaý kórsetedi. Qyrǵyzstandyq delegasıa ortalyqtardyń qyzmetimen tanysyp, jastardyń bastamalaryn qoldaý jáne ózin-ózi damytý múmkindikteri jóninde mol aqparat aldy.
Sapar barysynda jastar jobalaryn iske asyrý tájirıbesimen almasýǵa erekshe nazar aýdaryldy. Kezdesý sońynda taraptar eki el jastary arasyndaǵy yntymaqtastyqty nyǵaıtý, birlesken bastamalardy júzege asyrý jáne dostyq baılanystardy damytý maqsatynda birqatar is-sharalardy uıymdastyrýǵa kelisti.