Táýligine 10-15 jaǵdaı ǵana tirkelip otyr.
QR Densaýlyq saqtaý mınıstri Ajar Ǵınıat eldegi epıdemıologıalyq ahýaldy qanaǵattanarlyq deńgeıde dep baǵalady, dep habarlaıdy Almaty-akshamy.kz QazAqparatqa silteme jasap.
«Koronavıýrs ınfeksıasynyń taraý qarqyny báseńdegenin kórip otyrsyzdar. Táýligine 10-15 jaǵdaı ǵana tirkelip otyr. Sonyń ózinde táýligine 15 myń PTR-synama zerttelip jatyr. Osynyń 10-15-i ǵana vırýstyń bar ekenin kórsetýde. Bul qazirgi tańda epıdemıologıalyq jaǵdaı qanaǵattanarlyq deńgeıde ekenin rastap tur. Búginde shynymen de indettiń taraýy saıabyrsı bastady. Osyǵan baılanysty barlyq derlik shekteý sharalaryn alyp tastaǵanymyzdy bilesizder. Sonda da adamdar kóp jınalatyn jerlerde maska taǵýǵa keńes beremiz», - dedi mınıstr Úkimet otyrysynan keıin BAQ ókilderine bergen suhbatynda.
Onyń aıtýynsha, álemde epıdemıologıalyq jaǵdaı áli qalypqa túse qoımaǵan.
«Qazir Qytaıda «omıkronmen» naýqastaný kólemi artyp jatqanyn bilesizder. Birqatar Eýropa elderinde syrqattaný deńgeıi ósip otyr. Sondyqtan eldegi jaǵdaı turaqty bolǵanyna qaramastan, shekara mańaıynda shekteýler sol kúıinde qalyp otyr. PTR-test qorytyndysynsyz, vaksınalaý pasportynsyz tek óz azamattarymyz ǵana emes, sheteldikter de el aýmaǵyna kire almaıdy», - dedi vedomstvo basshysy.