Jalpy óńdeletin aýmaqtyń kólemi - 2424,54 gektar.
Almatyda búgin kenege qarsy dezınfeksıalyq óndeý jumystary bastaldy. Bul týraly Almaty qalasynyń sanıtarlyq-epıdemıologıalyq baqylaý departamentinen málim etti, dep habarlaıdy Almaty-akshamy.kz QazAqparatqa silteme jasap.
Almatyda ormandy alqap pen qala saıabaqtarynda, tynymbaqtarynda kenelerge qarsy dezınfeksıalyq óńdeý jumystarynyń 1 kezeńi bastaldy. Jalpy óńdeletin aýmaqtyń kólemi - 2424,54 gektar.
Qalalyq sanıtarlyq-epıdemıologıalyq baqylaý departamentinen habarlaǵandaı, dezınfeksıalyq óńdeý jumystarmen 8 ormandy alqap (kólemi - 1904,924 ga) jáne 144 qala saıabaqtary, tynymbaqtar (kólemi – 519,616 ga) qamtylady jáne aýa raıyna baılanysty (qurǵaq, jaýyn-shashynsyz kúnderi) kestege sáıkes 5 sáýir - 5 mamyr aralyǵynda júrgiziledi. Kene ensefalıtine qarsy kúrestiń nátıjesi sapaly bolýy úshin óńdeý jumysy eki kezeńde júrgiziledi. Ekinshi kezeń: mamyr, maýsym aılarynda ótedi.
Dezınfeksıalyq is-sharany qalalyq sanıtarlyq-epıdemıologıalyq baqylaý qyzmetiniń baqylaýymen «Almaty qalasynyń dezınfeksıa ortalyǵy» fılıaly júrgizedi.
Dezınfeksıalyq brıgadalar qajetti quraldarmen, kóliktermen jáne jeke bas qorǵanysh zattarymen qamtamasyz etilgen. Kene ensefalıtine qarsy dezınfeksıalyq óńdeý jumystaryn júrgizý úshin «Favorıt» akarısıdtik preparaty qoldanylady. Preparat az ýytty jáne qaýipti emes (3-4 klass). Kenelermen kúresý úshin qoldanylatyn dozalar az jáne adamdar men janýarlar úshin qaýipsiz bolyp tabylady. Óńdeý jumystary tańǵy ýaqytta júrgiziledi.
Óńdeletin aýmaqtardyń shekaralarynda «Kenege qarsy óńdeý júrgizilýde» degen eskertý habarlamalary bar taqtalar ornatylady.
«Qala turǵyndary tómende kórsetilgen saqtyq sharalaryn saqtaýy qajet: akarısıdty preparattyń eritindisin denege nemese kıimge tıgizip almas úshin, kenege qarsy dezınseksıalyq óńdeý jumystary júrgizilgen jerlerden qashyqtaý júrý kerek; jerge shashylǵan preparat kepkenge deıin úı janýarlaryn óńdeý jumystary júrgizilgen jerlerge jibermeý kerek; óńdeý jumystary júrizilgen jerlerden 40 kún boıy sańyraýqulaq, shóp nemese jıdekterdi jınaýǵa jáne paıdalanýǵa bolmaıdy; turǵyndar men qonaqtarǵa qala saıabaqtary men tynymbaqtaryna, tabıǵı oshaqtarǵa kenelerge qarsy óńdeý júrgizý kezinde jáne odan keıin 3 kún boıy barmaýy kerek», - dep eskertti departamentte.