Túrkistanda 12-14 sáýir kúnderi sýrdodzúdodan álem chempıonaty ótedi.
Álem birinshiligi Qazaqstan sýrdodzúdo federasıasy men Qazaqstan Sýrdlımpıada komıtetiniń uıymdastyrýymen ótkizilmek, dep habarlaıdy Almaty-akshamy.kz.
Álem chempıonatyna 25 elden 200 sportshy qatysady dep josparlanǵan.
«Qazaqstan jalpy sýrdlımpıadalyq sport túrleri boıynsha elimizde birinshi ret álem chempıonatyn qabyldaıyn dep otyr. Bul tarıhı oqıǵa jáne biz úshin úlken jaýapkerlishik. Estý qabileti zaqymdanǵan sportshylardy qoldaýdyń jarqyn belgisi dep bilemiz. Bizdiń elimizde dzúdo sporty jaqsy damyǵan. Sonyń ishinde sýrdo dzúdomen aınalysatyndar sany da az emes. Búgin sýrdo dzúdodan ulttyq quramamyzda el namysyn qorǵap júrgen sportshylar da óziniń sporttyq jolyn bala kezinde qarapaıym dzúdodan bastaǵan. Sportshylarymyzdyń eshteńege qaramastan, moıymaı, maqsatqa jetý jolyndaǵy jankeshtiligi bizdi árdaıym jigerlendiredi, tánti etedi. Túrkistan tatamıinde Sýrdlımpıada chempıondary, álem chempıondary bas qosady. Mundaı iri álemdik jarys elimizdegi sýrdlımpıadalyq sport túrleriniń damý qarqynyn jańa satyǵa kóteredi dep senemiz», - deıdi Qazaqstan sýrdo dzúdo federasıasynyń prezıdenti Qýanyshbek Muqash.
Aıta keterligi, sýrdodzúdodan álem chempıonaty Túrkistan qalasyndaǵy «Olympic centre» sport kesheninde ótedi.