Indýstrıa jáne ınfraqurylymdyq damý mınıstrligi «Kólik jáne komýnıkasıa mınıstriniń mindetin atqarýshy men Investısıalar jáne damý mınıstriniń mindetin atqarýshynyń keıbir buıryqtaryna ózgerister engizý týraly» buıryqtyń jobasyn ázirledi, dep habarlaıdy Almaty-akshamy.kz.
Buıryqtyń jańartylǵan nusqasynda «taksımen tasymaldaýshy» bóligi tolyqqan. Atap aıtqanda, endi ol jeke tulǵa, jolaýshylar men bagajdy taksımen tasymaldaý qyzmetin kórsetetin dara kásipker nemese zańdy tulǵa bolýy múmkin.
Aıta keteıik, qoldanystaǵy buıryqta «taksımen tasymaldaýshylar» qataryna jeke tulǵalar enbeıtin.
Sonymen birge, mundaı sanattaǵy taksı júrgizýshileri qyzmetin bastamas buryn jergilikti atqarýshy organǵa habarlama joldaýǵa mindetteledi.
«Qyzmetti kórsetýdi bastaǵanǵa deıin ınternet-platformalardy jáne platformalyq jumyspen qamtýdyń mobıldik qosymshalaryn paıdalana otyryp qyzmetter kórsetý nemese jumystar oryndaý jónindegi qyzmetti júzege asyratyn jeke tulǵa, dara kásipkerler nemese zańdy tulǵalar aýdandyq, oblystyq mańyzy bar qalalardyń, respýblıkalyq mańyzy bar qalalardyń, astananyń jergilikti atqarýshy organyna taksı tasymaldaýshysy retinde qyzmettiń bastalǵany týraly habarlama beredi», - delingen Ashyq NQA portalynda jarıalanǵan buıryq jobasynda.
Eger qujattar talapqa sáıkes kelgen jaǵdaıda QR Eńbek kodeksine sáıkes, onymen eńbek sharty jasalyp, keıin júrgizýshige jeńil taksıdi basqarýǵa ruqsat beriledi. Alaıda, taksı qyzmetin kórsetýge nıetti júrgizýshiniń jeke kóligi bolmasa, onda oǵan kásipker nemese zańdy tulǵa jeńil temir tulpar usynady.
«Jeke tulǵaǵa dara kásipker nemese zańdy tulǵa avtokólik quralyn jaldaý sharty boıynsha jeńil avtomobıl usynady. Jeke tulǵanyń talaptardy saqtaýyn baqylaý jeńil avtomobıldiń ıesi bolyp tabylatyn dara kásipkerge nemese zańdy tulǵaǵa júkteledi», - delingen jańa redaksıada.
Buıryqty ashyq talqylaý 9 maýsymǵa deıin jalǵasady.