«Qazaqstan ınjınırıń» ulttyq kompanıasy» AQ jańartylǵan úlgidegi «Shaǵala-M» ushqyshsyz ushý apparatynyń synaq jumystaryn sátti aıaqtady, dep habarlaıdy Almaty-akshamy.kz.
QR IIDM baspasóz qyzmetiniń málimeti boıynsha otandyq dronnyń taktıkalyq jáne tehnıkalyq sıpattamalary jaqsartylyp, jyldamdyǵy, áýege kóterilýi jáne ushý aýqymy keńeıdi.
«Qazaqstan ınjınırıń» ulttyq kompanıasy» AQ-nyń basqarma tóraǵasy Temirjan Ábdirahmanov aıtqandaı, elimizde qurastyrylǵan UUA ámbebaptyǵymen erekshe. Máselen, ony munaı-gaz, energetıka sektorlary jáne azamattyq qorǵanysta, onyń ishinde izdeý-qutqarý jumystarynda qoldanýǵa bolady. Buǵan qosa qazaqstandyq ónimniń tótenshe jaǵdaı kezinde tikushaqty almastyryp, munaı jáne gaz qubyrlaryna, sondaı-aq elektr jelilerine baqylaý júrgizýde paıdasy kóp.
«Shaǵala-M» apparatynyń artyqshylyǵy oǵan ushyp-qoný jolaǵy qajeti joq. Baǵasy sheteldik analogtarmen salystyrǵanda arzan. Atalǵan ónimdi satý máselesine kelsek, ST–KZ jáne ındýstrıalyq sertıfıkattary men patenti bar», - dedi «Qazaqstan ınjınırıń» R&D ortalyǵynyń bas dırektory Ǵanı Baıseıitov.
Bul oraıda bıyl QR Indýstrıa jáne ınfraqurylymdyq damý mınıstrligi Qazaqstannyń áýe keńistiginde Ushqyshsyz ushý apparattaryn paıdalaný jónindegi erejeni ázirlep, soǵan sáıkes áýe keńistigin paıdalaný tártibinen bólek ushý apparattaryn esepke alý, sanattarǵa bólý men drondarǵa ruqsat qujattaryn berý joldary qarastyrylǵan.
Budan basqa ulttyq kompanıanyń avıasıalyq-oqý ortalyǵynda azamattyq maqsattaǵy drondar men kopterlerdiń qaýipsiz jáne tıimdi jumysyn qamtamasyz etý úshin ushqyshtar men mehanıkterdi daıarlaý baǵdarlamasy iske qosylǵanyn aıta keteıik.