Qazaqstanda alǵash ret sporttyq bilim berý júıesinde kadr daıarlaýdyń jańa sanattary engizildi.
Buǵan deıin oqytý tek mekteptegi dene shynyqtyrý pánine baǵyttalǵan «Dene shynyqtyrý» mamandyǵy aıasynda júrgizilse, endi jattyqtyrýshy, ádisteme, ońaltý, ınklúzıvti jáne sıfrlyq sport baǵyttaryn qamtıtyn arnaıy baǵdarlamalar iske qosyldy, dep habarlaıdy aqshamnews.kz.
Bul – elimizde sport mamandaryn daıarlaýǵa júıeli ári ǵylymı tásil qoldanýdyń alǵashqy qadamy. Dene shynyqtyrý jáne buqaralyq sport akademıasynyń bazasynda mynadaı bilim berý baǵdarlamalary júzege asyrylýda:
«Jattyqtyrýshylyq qyzmet (sport túrleri boıynsha)»
«Sport jáne saýyqtyrý salasyndaǵy nusqaýshy-ádisker»
«Sporttyq ońaltý»
«Ústel ústi sport túrlerinen pedagog-jattyqtyrýshy (shahmat, toǵyzqumalaq)»
«Kıbersport (Esport)»
«Dene shynyqtyrý jáne sport (IP)»
«Beıimdelgen dene shynyqtyrý boıynsha pedagog»
«Qazaq kúresi boıynsha pedagog-jattyqtyrýshy»
Barlyq baǵdarlamada tájirıbege basymdyq berilgen. Stýdentter oqý barysynda sport federasıalarynda, klýbtarda, ınklúzıvti jáne ońaltý ortalyqtarynda taǵylymdamadan ótip, naqty jaǵdaılarda kásibı daǵdylaryn jetildiredi. Oqý modýlderine sporttyq taldaý negizderi, quqyqtyq daıyndyq, jekeleı jattyǵý júıesi, jaraqattyń aldyn alý, alǵashqy kómek jáne sport psıhologıasy sıaqty pánder engizilgen.
Mamandardy daıarlaýdyń jańa júıesindegi mańyzdy jańalyqtyń biri – Qazaqstanda alǵash ret iske qosylǵan Executive MBA Sport Management halyqaralyq qos dıplomdy baǵdarlamasy. Ony Akademıa Fransıanyń EKLORE-ed School of Management ýnıversıtetimen birlesip ázirlegen.
Bul – eldegi sport salasynyń mamandary men basshylaryna arnalǵan alǵashqy basqarý magıstratýrasy. Baǵdarlama basqarýshylyq oılaý qabiletin, halyqaralyq standarttar men sport ındýstrıasyndaǵy naqty tájirıbelerdi biriktiredi. Sonymen qatar shetelde taǵylymdamadan ótý jáne eýropalyq dıplom alý múmkindigin qarastyrady.
Mınıstrlik sportty damytýda ǵylymı negizdelgen, turaqty ári zamanaýı modeldi engizý jumystaryn jalǵastyrady. Bul rette mamandardy sapaly daıarlaýǵa jáne olardyń kásibı jetistikterin qoldaýǵa basymdyq beriledi.