Almaty qalalyq polısıa departamentinde jol qozǵalysy qaýipsizdigin arttyrý jáne jolaýshylar tasymaly salasyndaǵy tártipti nyǵaıtý máselelerine arnalǵan keńes ótti.
Oǵan ákimshilik polısıa qyzmetkerleri, avtoparkterdiń ókilderi, qoǵam belsendileri jáne sarapshylar qaýymdastyǵy qatysty, dep habarlaıdy aqshamnews.kz.
Almaty qalasy PD ákimshilik polısıa basqarmasynyń bastyǵy Asqat Qulbaevtyń aıtýynsha, joldardaǵy qaýipsizdikti qamtamasyz etý, ásirese jolaýshylardy tasymaldaý kezinde, barlyq múddeli taraptardyń ortaq jaýapkershiligin talap etetin basym baǵyttardyń biri.
— Qazirgi ýaqytta elimiz boıynsha “Tasymaldaýshy” jedel aldyn alý is-sharasy ótip jatyr. Onyń basty maqsaty – jol qaýipsizdigin arttyrý jáne qoǵamdyq kólik júrgizýshileri tarapynan zań buzýshylyqtarǵa jol bermeý. Tasymaldaý qaýipsizdigin qamtamasyz etý - bizdiń ortaq mindetimiz. Barlyq qyzmetterdiń úılesimdi jumysy men tártipti ustaný arqyly ǵana qala turǵyndarynyń senimin aqtap, qaıǵyly oqıǵalardyń aldyn alýǵa bolady, - dedi Asqat Qulbaev.
Keńeste 2025 jyldyń alǵashqy jartyjyldyǵynda qoǵamdyq kóliktiń qatysýymen oryn alǵan jol-kólik oqıǵalaryna taldaý jasaldy. Jaraqat alǵandar sany da artyp otyrǵany atap ótildi. Sonymen qatar jedel aldyn alý is-sharalary barysynda qoǵamdyq kólik júrgizýshileri tarapynan jol erejelerin buzý derekteri jáne tehnıkalyq aqaýy bar avtobýstardyń paıdalanylǵany belgili boldy. Kólik júrgizýshilerin daıarlaý, olardyń tártibi, reıs aldyndaǵy nusqamalar men avtokásiporyndar tarapynan baqylaý máselelerine erekshe nazar aýdaryldy.
Jańa oqý jyly qarsańynda, jolaýshylar aǵyny men qoǵamdyq kólikke túsetin júkteme artatyn kezeńde, aldyn alý sharalaryn kúsheıtýdiń mańyzdylyǵy atap ótildi. Taraptar tasymaldaý qaýipsizdigi deńgeıin arttyrý jáne jol qozǵalysyna jaýapkershilikpen qatysý mádenıetin qalyptastyrý boıynsha odan ári ózara is-qımyl jáne kúsh-jigerdi úılestirý qajettiligi týraly ortaq pikirge keldi.