Temeki ónimderiniń aınalymy sáıkestendirý quraldary bolǵan kezde ǵana múmkin bolady
Temeki ónimderin sıfrlyq tańbalaý 2022 jyldyń 1 qańtarynan bastap júrgizilip keledi, dep habarlaıdy Almaty-akshamy.kz.
QR QM Memlekettik kirister komıtetiniń habarlaýynsha, qaǵaz aksızdik markalardyń kúshin joıýǵa baılanysty 2022 jylǵy 1 qańtardan bastap temeki ónimderi tek sáıkestendirý quraldarymen tańbalanatyny belgili.
Qazaqstan Respýblıkasy Úkimetiniń qaýlysymen mindetti tańbalaýǵa jatatyn temeki ónimderi túrleriniń naqty tizbesi (sıgaretter, sıgarıllalar, sıgaralar, stıkter, kalán temekisi jáne t.b.) bekitildi.
Qazaqstan Respýblıkasynyń zańnamasyna sáıkes, temeki ónimderiniń aınalymy sáıkestendirý quraldary bolǵan kezde ǵana múmkin bolady.
Sondaı-aq, Memlekettik kirister komıtetinde endi temeki ónimderiniń barlyq túrlerinde sıfrlyq tańbalaýdyń (sáıkestendirý quraldarynyń) bolmaǵany úshin memlekettik kirister organdary temeki ónimderin tárkileı otyryp, ákimshilik jaýapkershilikke tartylatynyn eske saldy.
Memlekettik kirister komıteti sıfrly tańba bolmaǵan jaǵdaıda qandaı aıyppuldar qarastyrylatynyn da aıtty:
Tolysylǵan sharap, syra qaınatý ónimin, esepke alý-baqylaý markalarymen jáne temeki ónimderin sáıkestendirý quraldarymen qospaǵanda, alkogól ónimin tańbalaý (qaıta tańbalaý) qaǵıdalaryn buzý
Tolysylǵan sharap, syra qaınatý ónimin, esepke alý-baqylaý markalarymen jáne temeki ónimderin sáıkestendirý quraldarymen qospaǵanda, óndirýshiniń nemese ımporttaýshynyń alkogól ónimin tańbalaý (qaıta tańbalaý) qaǵıdalaryn buzýy – quqyq buzýshylyqtyń tikeleı nysanasy bolǵan aksızdeletin taýarlar tárkilene otyryp, sondaı-aq lısenzıadan aıyra otyryp, orta kásipkerlik sýbektilerine – 200, iri kásipkerlik sýbektilerine 500 aılyq eseptik kórsetkish mólsherinde aıyppul salýǵa ákep soǵady.
Aksızdeletin ónimdi sáıkestendirý quraldarynsyz jáne (nemese) esepke alý-baqylaý tańbalarynsyz, sol sıaqty belgilenbegen úlgidegi jáne (nemese) sáıkestendirýge kelmeıtin tańbalarmen jáne sáıkestendirý quraldarymen saqtaý, ótkizý jáne (nemese) tasymaldaý túrinde jasalǵan, sáıkestendirý quraldarymen jáne (nemese) esepke alý-baqylaý tańbalarymen tańbalanýǵa jatatyn aksızdeletin taýarlardyń aınalymy, – quqyq buzýshylyqtyń tikeleı nysanasy bolǵan aksızdeletin taýarlar tárkilene otyryp, sondaı-aq lısenzıadan aıyra otyryp, jeke tulǵalarǵa – 50, shaǵyn kásipkerlik sýbektilerine – 150, orta kásipkerlik sýbektilerine – 200, iri kásipkerlik sýbektilerine – 500 aılyq eseptik kórsetkish mólsherinde aıyppul salýǵa ákep soǵady.
Jyl basynan bastap (2022 jyldyń 10 tamyzyndaǵy jaǵdaı boıynsha) Qazaqstan Respýblıkasynyń aýmaǵyna kontrabandalyq jolmen ákelinip, satylmaqshy bolǵan temeki ónimderiniń 22,5 mln qoraby anyqtalyp, tárkilengen.