Jylyna 80 myńdaı pedagog biliktiligin arttyrady
Elimizde muǵalimderdiń biliktiligin arttyrýda jańa tásil engizildi, dep habarlaıdy Almaty-akshamy.kz Almaty.tv-ge silteme jasap.
Jańashyldyqty úkimet otyrysynda oqý-aǵartý mınıstri Asqat Aımaǵambetov habarlaǵan bolatyn. Endi pedagogtar 5 jyldyń ornyna 3 jylda biliktilik arttyrý kýrsynan ótpek.
«Negizinen zań talabyna keler bolsaq pedagog mártebesi jáne bilim berý zańyna sáıkes pedagogtar bizde 3 jylda bir ret biliktilikti arttyrý kýrsynan ótýi mindetti. Úzdiksiz bilim berý nemese biliktilikti arttyrý fılosofıasyna negizdeımiz. Bizdiń kýrstar júıeleý nemese jalpy kómek berý olardy suraqtary bolsa túsinikteme berý turǵysynan óte paıdaly», – dedi «Órleý» biliktilikti arttyrý ulttyq ortalyǵynyń departament dırektory Erjan Tileýbergenov.
Kóptegen oqý oryndary osy kýrstardan ótý sertıfıkattaryn berýdi talap etedi jáne olarsyz jumysqa qabyldamaıtyn kórinedi.
«Bizdiń kýstarǵa mektepte jumys isteıtin pedagogtar ǵana qatysa alady. Sebebi, bilim basqarmasynan keletin tizimde ol adam jumys isteýi qajet. Endi jumysqa turýy kezinde biliktilikti arttyrý kýrsynan sertıfıkaty qajet pe? Joq, BǴM-niń 57-buıryǵynda ondaı talap kórsetilmegen. Biraq basqa salaǵa ketip, qaıta bilimimdi jańǵyrtqym keledi degen adamdar bolsa, aqyly kýrstarǵa óz qarajatynan oqysa bolady. Oǵan tıym salynbaǵan», – dedi «Órleý» biliktilikti arttyrý ulttyq ortalyǵynyń departament dırektory Erjan Tileýbergenov.
Erjan Tileýbergenovtyń aıtýynsha, jyl saıyn 80 myńdaı pedagog biliktiligin arttyrady.
«Jyl saıyn orta shamamen 80 myńdaı pedagog biliktiligin arttyrady. Osy 80 000 ishine mektepke deıingi, orta bilim berý uıymdary jáne basqa býyndar bar. Biz qazir 12 pánnen kýrs ótip jatyr. Ony úzdik oqytýshylar daıarlap jatyr. Endi bul kýrstar muǵalimderge qyzyqty ári paıdaly bolady dep senemiz. Muǵalimder óz pánine pándik áriptesterimen biliktiligin arttyrýdy óte paıdaly dep esepteıdi jáne ony rastaıtyn halyqaralyq zertteý bar», – dedi Erjan Tileýbergenov.