Qazaqstanda óńdeý ónerkásibin damytýdyń 2023–2029 jyldarǵa arnalǵan strategıasynyń aıasynda shaǵyn ónerkásiptik aımaqtardy (SHÓA) qurý baǵdarlamasy belsendi júzege asyrylýda.
Bul — shaǵyn jáne orta bıznesti qoldaýdyń jańa quraly, kásipkerlerge daıyn óndiristik ǵımarattardy jeńildetilgen jaldaý sharttarymen usynýǵa negizdelgen, dep habarlaıdy aqshamnews.kz.
SHÓA nysandary qajetti ınjenerlik jelilermen jáne kólikke yńǵaıly ınfraqurylymmen qamtamasyz etiledi. Mundaı jaǵdaılar jańa jobalardy iske qosýdaǵy kedergilerdi azaıtyp, bolashaqta kásiporyndardyń tıimdi jumys isteýine múmkindik beredi.
«QazIndustry» Qazaqstandyq ındýstrıa jáne eksport ortalyǵy» AQ arnaıy ekonomıkalyq jáne ındýstrıalyq aımaqtardy damytý dıreksıasy derekteri boıynsha aǵymdaǵy jyldyń birinshi jartyjyldyǵynyń sońyna deıin Túrkistan oblysynda jalpy aýmaǵy 19 myń sharshy metr bolatyn 12 shaǵyn óndiristik aımaq iske qosylady dep kútilýde. Jyl sońyna deıin óńirlerde taǵy 19 osyndaı aımaqty ashý josparlanyp otyr. 2026 jyldyń birinshi toqsanynda úsh aımaq ashylady.
Jańa baǵdarlamaǵa sáıkes shaǵyn ónerkásiptik aımaqtardy qurý úsh baǵytta júzege asady: jańa óndiristik ǵımarattar salý, bos turǵan óndiris nysandaryn qaıta jańǵyrtý (Ready built factory úlgisi boıynsha) jáne jumys istep turǵan kásiporyndardy keńeıtý.
Baǵdarlama básekege qabiletti óndiristerdi damytýǵa, jańa jumys oryndaryn ashýǵa jáne el ekonomıkasyndaǵy shaǵyn jáne orta bıznestiń úlesin arttyrýǵa baǵyttalǵan. Shaǵyn ónerkásiptik aımaqtar arnaıy ekonomıkalyq nemese ındýstrıalyq aımaqtardyń aýmaǵynda da, odan tys jerlerde de qurylýy múmkin. Bul kásipkerlerge óz isin bastaýǵa nemese keńeıtýge qosymsha múmkindik beredi.
«QazIndustry» Qazaqstandyq ındýstrıa jáne eksport ortalyǵynyń málimetinshe, ınvestorlar tarapynan barlyǵy elimizdiń segiz óńirinde 34 shaǵyn ónerkásiptik aımaq qurý jobasyn júzege asyrýda. Mundaı aımaqtar Astana men Shymkent qalalarynda, sondaı-aq Soltústik Qazaqstan, Qaraǵandy, Qostanaı, Jambyl, Qyzylorda jáne Túrkistan oblystarynda qurylmaq. Bul ónerkásiptik aımaqtardyń jalpy aýmaǵy shamamen 265 myń sharshy metrdi quraıdy
Baǵdarlamany júzege asyrý bızneske arnalǵan daıyn ǵımarattardyń tapshylyǵy máselesin sheshýge jol ashady. Shaǵyn ónerkásiptik aımaqtar ındýstrıalandyrý men ekonomıkanyń ósýine serpin berip, kásipkerlikti qoldaýdyń tıimdi tetigine aınalyp keledi.