Almaty ákimi Darhan Satybaldy «Keleshek mektepteri» jobasy aıasynda salynyp jatqan mektep qurylysyn bıyl tamyz aıyna deıin aıaqtaýdy tapsyrdy, - dep habarlaıdy aqshamnews.kz.
Qala basshysy Darhan Satybaldy jumys sapary aıasynda Medeý aýdanyn aralap, qalanyń iri aýdandarynyń biri retinde onyń damýyna arnalǵan jobalarmen tanysty.
Sapar shyǵys aınalma jolynyń (SHAAJ) ýchaskesinen bastaldy. Munda jasyl aımaqtardy tıisti kútimmen qamtamasyz etý úshin avtomatty sýarý júıesin kúrdeli jóndeýden ótkizý máselesi qaraldy.
Qala basshysy «Taza Qazaqstan» respýblıkalyq baǵdarlamasy aıasynda qalany abattandyrý jumystaryn tikeleı óz baqylaýyna alatynyn atap ótti.
"Ár azamat mundaı iske jaýapkershilikpen qaraýy tıis. Qazir kóptegen kafe, meıramhana, dúken ıeleri aınalasyn tazalaýǵa kelgende bul isti ákimdikke silteıdi. Alaıda tazalyq bárimizge ortaq mindet ekenin eskerip, bul jumysqa bári birdeı atsalysýy qajet", – dedi Darhan Satybaldy.
Medeý aýdanyna qarasty «Dýman» shaǵynaýdanynda halyq sanynyń ósýine baılanysty jańa turǵyn úı keshenderi boı kóteriýde. Osyǵan oraı qalada táýligine 500 adamdy qabyldaı alatyn otbasylyq-dárigerlik ambýlatorıa salý jospary qarastyrylýda. Ákim turǵyndarmen kezdesip, jańa emhana ashylǵannan keıin medısınalyq qyzmetterdiń barlyq sanattaǵy azamattar úshin qoljetimdi bolatynyn jetkizdi.
Budan keıin qala basshysy «Keleshek mektepteri» ulttyq jobasy aıasynda salynyp jatqan mekteptiń qurylys alańyna bardy. 2000 oqýshyǵa arnalǵan mektep jobasynda úsh qabatty oqý ǵımaraty, jertólede ornalasatyn asqana, akt zaly, jeke avtoturaq pen sport alańy qarastyrylǵan. Qala ákimi merdiger kompanıaǵa qurylys jumystaryn aǵymdaǵy jyldyń tamyzyna deıin tolyq aıaqtap, jańa oqý jylynda oqýshylardyń sabaqty jańa mektepte bastaýyn qamtamasyz etýdi tapsyrdy.
Jumys sapary kezinde Darhan Satybaldy Kabylov kóshesinde ornalasqan, eki jyldan astam ýaqyt bos turǵan toǵyz ǵımarattan turatyn keshendi kórip shyqty. Bul aýmaqta áleýmettik nysandarǵa degen suranys joǵary. Osyǵan baılanysty nysandardy komýnaldyq menshikke ótkizý arqyly tıimdi paıdalaný máselesi kóterildi. Qala basshysy turǵyndardyń qajettilikterin eskere otyryp, bul máseleni jan-jaqty qarastyrýdy tapsyrdy.
Sapar sońynda qala ákimi «Almaty Tazalyq» memlekettik komýnaldyq kásipornynyń bazasyna bardy. Kásiporyn 361 shaqyrymdyq kóshe-jol jelisin qamtıdy, 157 arnaıy tehnıkamen jabdyqtalǵan. Munda ákim qala ishindegi joldardy jyl boıy kútimdeý jumystarymen jáne taýly aýmaqtardaǵy jumystardyń barysymen tanysty.
Jumys saparynyń qorytyndysy boıynsha Darhan Satybaldy kóshe-jol jelisin tazalaý jumystaryn qatań baqylaýǵa alýdy tapsyrdy. Kóshelerdiń kútimsizdigine aýdan kimderi tikeleı jaýap beretinin eskertti.