Básekelestikti qorǵaý jáne damytý agenttigi zertteý júrgizip, qus eti óndirisi artsa da, ımporttyń áli de naryqtyń úshten birin quraıtynyn anyqtady. Munyń sebebi, fermerler tek 66%-dyq suranysty qamtamasyz etip, qalǵan 34%-y shetelden ákelinedi, dep habarlaıdy aqshamnews.kz
Negizgi sebep — qazaqstandyq óndiristiń joǵary ózindik quny. Shyǵyndardyń kóbi jemshópke ketedi, al onyń baǵasy syrtqy naryqtarǵa táýeldi. Alaıda ımporttaýshylar arasynda da jaǵdaı ońaı emes — naryqta iri óndirýshiler ǵana basym, al kishi kásipkerler naryqtan syrt qalýda.
«90% kvotalar burynnan aınalysyp júrgen jetkizýshilerge tıesili. Al jańadan kásip bastaǵan qatysýshylarǵa tek 10%-y beriledi. Bul básekelestikti shektep, jańa óndirýshilerdiń naryqqa shyǵýyna kedergi jasaıdy», — dep túsindirdi Básekelestikti qorǵaý jáne damytý agenttigi.
Bul jaǵdaıdy Shyǵys Qazaqstan jáne Ulytaý oblystaryndaǵy otandyq kóterme jetkizýshiler de paıdalandy. Keıbir kompanıalar óńirler arasynda qaıta satýdy shektep, ártúrli baǵalardy belgiledi. Árıne, bul baǵaǵa ózindik áserin tıgizetini anyq. Sonymen qatar, Astana men Mańǵystaý oblysynda saýda ústemeleri 15%-ǵa deıin kóterilgeni baıqaldy. Saýda mınıstrligi jaǵdaıdy tekserýge mindetti boldy.
«Biz tıisti organdarǵa júıeli sharalardy qabyldaýdy usyndyq. Olardyń ishinde — sýbsıdıalardy habarlaý prosesin avtomattandyrý, olardy bólýdiń krıterıılerin qaıta qaraý, naryq qatysýshylaryna qatysty kemsitýdi joıý jáne ýaqytyly memlekettik qoldaý kórsetý», — dep túsindirdi agenttik.
Alaıda, monopolıser naryqty áli de baqylap otyr. Sáıkesinshe saýda jelileri óz paıdasyn kórý úshin baǵany kóterýge májbúr. Saldaryn el turǵyndary kórip otyr.