Almaty qalasynyń polısıasy qylmys jıi tirkeletin oıyn-saýyq oryndaryn anyqtap, olardyń qaýipsizdik sharalaryn kúsheıtý qajettigin málimdedi, dep habarlaıdy Aqshamnews.kz
İshki ister mınıstri jarıalaǵan profılaktıka jyly aıasynda Áýezov aýdanynda oıyn-saýyq mekemelerindegi qaýipsizdik máselesi talqylandy. Jıynǵa aýdandyq polısıa basqarmasy, tótenshe jaǵdaılar departamenti, sanıtarlyq-epıdemıologıalyq qyzmet mamandary, sondaı-aq bar, meıramhana jáne túngi klýb ıeleri qatysty.
Áýezov aýdandyq polısıa basqarmasynyń bastyǵy Danıar Meńdebaevtyń aıtýynsha, aýdanda 65 oıyn-saýyq mekemesi bar, onyń 16-synda buzaqylyq pen tóbeles jıi tirkeledi. Ótken jyly osy oryndarda 61 qylmys jasalǵan.
"Kóptegen mekemeler tájirıbesi jáne tıisti lısenzıasy joq kúzet uıymdarynyń qyzmetine júginedi. Kúzetshiler kelýshiler arasyndaǵy janjaldardy toqtatýdyń ornyna, olardy ǵımarattan shyǵaryp jiberýmen ǵana shekteledi. Bul qylmystyń kóbeıýine yqpal etedi", – dedi Meńdebaev.
Komısıa otyrysynyń qorytyndysy boıynsha oıyn-saýyq oryndarynda qylmystyń aldyn alý sharalaryn kúsheıtý týraly sheshim qabyldandy. Sondaı-aq esirtki saýdasynyń jolyn kesý jumystary basty nazarǵa alynbaq.
Oıyn-saýyq mekemeleriniń ıelerine:
Lısenzıasy bar kásibı kúzet qyzmetin qoldaný;
Beınebaqylaý kameralaryn ornatý jáne olardyń sanyn arttyrý;
Qaqtyǵys jaǵdaılaryn azaıtý úshin qosymsha qaýipsizdik sharalaryn qarastyrý mindetteldi.
Almaty qalasynyń quqyq qorǵaý organdary qaýipsizdik erejelerin buzǵan oıyn-saýyq oryndaryna qatań sharalar qoldanatynyn eskertti.