Qaýymdastyqqa birneshe aqparat agenttigi kiredi.
Aqparattyq alańda ózindik baǵyt-baǵdary bar, turaqty aýdıtorıasy qalyptasqan qazaqtildi saıttar, gazet-jýrnaldar bas biriktirip, «Qazaq medıaqaýymdastyǵyn» qurdy, dep habarlaıdy Almaty-akshamy.kz
Jańadan qurylǵan «Qazaq medıaqaýymdastyǵynyń» prezıdenti bolyp saılanǵan jýrnalıs Dýman Byqaı qazaqtildi aýdıtorıanyń burynǵydaı buıyǵy emes, kerisinshe, belsendi bolyp kele jatqanyn atap ótti.
«Búginde toı-bıznes pen shoý-bıznestiń tóńiregindegi kontent ýaqyttyń eleginen ótpedi. Óıtkeni oqyrman ózgerdi. Eseıdi. Kez kelgen sheshimdi qazaqtildi ortanyń qas-qabaǵyna qarap qabyldaıtyn zaman kele jatyr. Osy rette sońǵy kezde qasterli qundylyqtarymyzǵa til tıgizgen áreketterdiń jıilep ketkenin eskersek, olarǵa qarymta qaıtaryp, tosqaýyl qoıýdyń da óz tetigi bolýy kerek ekenin umytpaý qajet», – dedi Dýman Byqaı.
Qaýymdastyq basshysy sondaı-aq elimizdegi kvazısektordyń áli kúnge deıin óz áleminde ómir súretinin, qazaqtildi medıamen qoıyn-qoltyq jumys isteıtin ulttyq, sheteldik kompanıalar joqqa tán ekenine toqtaldy.
«Qazaq medıaqaýymdastyǵy» osy olqylyqtyń ornyn toltyrýdy kózdep otyr. Qazaqtildi segmenttiń satyp alý qabileti tómen degen stereotıpten arylatyn kez keldi dep sanaımyz. Qaýymdastyqty aqparattyq alańdaǵy bılik pen qarjy ınstıtýttary sanasatyn beldi, belsendi qurylymǵa aınaldyrýdy kózdep otyrmyz», – dedi D. Byqaı.