Almaty qalasynda sıntetıkalyq esirtki óndirisi boıynsha asa iri kólemdegi qylmystyq ister boıynsha úkimder kúshine endi, dep habarlaıdy Almaty-akshamy.kz Polisia.kz-ke silteme jasap.
Birinshi úkim mefedron óndirisin esirtki ótkizý maqsatynda uıymdastyrǵan 24 jastaǵy H. Islamov jáne 25 jastaǵy S. Epıfanov degen qala turǵyndaryna qatysty. Sot anyqtaǵandaı, olar buryn esirtkini bir rettik dozaǵa bólip, olardy baılanyssyz túrde satý arqyly aqsha tabýǵa tyrysqan. Polısıanyń nazaryna túspeý úshin qylmyskerler esirtki partıasyn bólip-oraý úshin páterlerdi táýlikke jalǵa alyp otyrǵan. Keıinnen olar qamaýǵa alý qaýpin azaıtyp, kiristerin kóbeıtý týraly sheshim qabyldap, mefedron óndirisin uıymdastyrǵan. Saıajaı úıin jalǵa alyp, óndiriske qajetti hımıalyq zattar men jabdyqtar ákelgen. Bul ýaqytta olar polısıanyń baqylaýynda edi. Tórt kúnnen keıin esirtkiniń birinshi partıasyn óndirý kezinde qylmyskerler ustalǵan.
Saıajaı úıin tintý barysynda polısıa qyzmetkerleri óndiristiń sońǵy satysyndaǵy mefedron eritindisin, esirtki izderi bar jabdyqty jáne ony daıyndaý men ótkizýge qajetti túrli zattardy tapqan. Saraptama nátıjeleri kórsetkendeı, tárkilengen sıntetıkalyq esirtkiniń salmaǵy 4 keli qurady, bul asa iri ólshem bolyp esepteledi. Sottalýshylardyń jas balalarynyń bar bolýyn, sondaı-aq olardyń tergeýge belsendi járdemdesýin eskere otyryp, H. Islamov pen S. Epıfanov árqaısysyna 11 jylǵa bas bostandyǵynan aıyryldy.
Ekinshi úkim Almaty qalasynyń 27 jastaǵy turǵyny M. Shevsovqa qatysty boldy, ol da satý úshin mefedron óndirisin uıymdastyrǵan. Aıyptalýshy kórsetkendeı, esirtkiniń alǵashqy partıalary durys shyqpaǵan, jasaı almaǵan. Sondyqtan sıntetıka óndirisi úshin ol óziniń turǵylyqty jerinen alys emes jerde páter jaldap, eki kún boıy ony “tehnologıalyq prosesti” muqıat saqtap otyryp daıyndaǵan. Tintý barysynda jalǵa alynǵan páterde qylmysty asa iri mólsherde esirtki óndirisi retinde saralaýǵa múmkindik beretin barlyq dálelder tabylǵan. Olardy óndirýge jáne ólshep oraýǵa arnalǵan jabdyqtar, sondaı-aq 200 gram daıyn zat tárkilendi. Sot otyrystarynda Shevsov jeke tutyný úshin esirtki shyǵarǵanyn aıtyp, jazany azaıtýǵa tyrysqan. Alaıda sotqa usynylǵan dálelder bul aıǵaqtardy joqqa shyǵarýǵa múmkindik berdi. Nátıjesinde, Shevsov 297-bapta (Esirtki quraldaryn, psıhotroptyq zattardy, sol tektesterdi asa iri mólsherde ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý, jóneltý ne ótkizý) kózdelgen qylmysty jasaýda kináli dep tanyldy. 10 jyl merzimge bas bostandyǵynan aıyrý jazasy taǵaıyndaldy. Úkimder zańdy kúshine endi. Sottalǵandar jazasyn qaýipsizdigi barynsha joǵary Qylmystyq-atqarý júıesi mekemelerinde óteıtin bolady.