Ótken jyly halyqtyń qartaıý ındeksi 26,6 bolǵan.
Elimizde qartaıý ındeksi ósip jatyr. Bul týraly Ulttyq statısıka búrosy málimetinde aıtylǵan, dep habarlady Almaty-akshamy.kz.
2021 jyly óńirlerde halyqtyń qartaıý ındeksi 26,6 bolǵan. Bul elimizde 0-15 jas aralyǵyndaǵy árbir 100 balaǵa 65 jastan asqan 26,6 azamat keledi degen sóz. 2017 jyly bul kórsetkish 25,9 deńgeıinde bolǵan.
Aýyldyq jerlermen salystyrǵanda, qalalarda qartaıý deńgeıi joǵary – 28,7. 2019-2020 jyldar aralyǵynda qala ındeksi 29,1 deńgeıinde baǵalandy.
«Óńirler arasynda eń joǵary kórsetkish Soltústik Qazaqstan oblysynda tirkeldi. Ondaǵy ındeks – 66,5. Eń jas qala Shymkent boldy, ıaǵnı 100 balaǵa 65 jastan asqan 14,3 adam keledi. Elorda turǵyndary da salystyrmaly túrde jas. Astana ındeksi – 17,3. Aýyl turǵyndarynyń qartaıý ındeksi qala kórsetkishinen 4,9 tarmaqqa (23,9) tómen. Kórsetkish bes jyl ishinde shamaly ózgerdi. 2017 jyly 100 balaǵa 22,4 eresek adam keldi», – delingen habarlamada.