Qazaqstanda 24 naýryzdan bastap mobıldi qurylǵylardyń IMEI-kodtaryn tekserýdiń jańa erejeleri engiziledi.
Bul shara zańsyz ákelingen nemese urlanǵan telefondardy anyqtap, olardyń uıaly jelige qosylýyn shekteýge baǵyttalǵan, dep habarlaıdy aqshamnews.kz.
IMEI-kodtar úsh sanatqa bólinedi:
1. Aq tizim: Zańdy túrde satyp alynǵan jáne tirkelgen qurylǵylar. Bul telefondar eshqandaı shekteýsiz jumys isteıdi.
2. Sur tizim: IMEI-kody kúmándi nemese qaıtalanatyn qurylǵylar. Mundaı telefondardyń ıelerine 30 kún ishinde satyp alýdyń zańdylyǵyn dáleldeý múmkindigi beriledi.
3. Qara tizim: Urlanǵan nemese qoldan jasalǵan smartfondar. Bul qurylǵylar Qazaqstanda uıaly jelini paıdalana almaıdy.
Eger smartfonyńyz zańdy túrde satyp alynǵan bolsa, alańdaýdyń qajeti joq. Degenmen, qurylǵyńyzdyń IMEI-kodynyń mártebesin tekserý usynylady. Bul úshin Memlekettik radıojıilik qyzmetiniń resmı saıtyndaǵy arnaıy servısti paıdalana alasyz.
IMEI-kodyńyzdy tekserý úshin:
1. Telefonyńyzda *#06# terińiz – ekranda IMEI-kod paıda bolady.
2. Atalǵan kodty joǵaryda kórsetilgen saıttaǵy tekserý órisine engizińiz.
Eger IMEI-kodyńyz “sur tizimde” bolsa, 30 kún ishinde qurylǵynyń zańdylyǵyn dáleldeý úshin qajetti sharalardy qabyldaýyńyz qajet. Bul týraly tolyǵyraq aqparatty Memlekettik radıojıilik qyzmetiniń saıtynan ala alasyz.
Eger siz paıdalanylǵan uıaly telefondy satyp alýdy josparlasańyz, qurylǵynyń urlanǵandar tiziminde joqtyǵyn tekserý mańyzdy. Bul úshin joǵaryda atalǵan saıttaǵy arnaıy servısti paıdalana alasyz.
Osy sharalar Qazaqstanda zańsyz ákelingen jáne urlanǵan telefondardyń sanyn azaıtýǵa, sondaı-aq uıaly baılanys qyzmetteriniń sapasyn arttyrýǵa baǵyttalǵan.