Almaty Kólik jáne komýnıkasıalar koleji (AKTK) óziniń 95 jyldyǵyna oraı medıaholdıng Alatau Aqparat medıaholdıngi komandasyn shaqyryp, ústel tenısinen «Altyn raketka» týrnırin uıymdastyrdy.
Jarysqa kolej oqytýshylary men jýrnalıser qatysty. Alatau Aqparat medıaholdıngi komandasyn bas dırektory Erjan Qalymbaıuly bastap bardy.
Medıaholdıng ókilderin kolejde erekshe qurmetpen qarsy aldy.
- Prezıdent bıylǵy jyldy Jumysshy mamandyqtar jyly dep jarıalaǵany belgili. Osy turǵyda sizderdiń kolejderińiz jumysshy mamandardy daıyndaýda ólsheýsiz úles qosýda. Sońǵy jyldary álemdik deńgeıde ótip jatqan Word skills kásipqoılar chempıonatynda kolej joǵary nátıjelerge qol jetkizdi, bul sizderdiń oqý oryndaryńyz úshin laıyqty baǵa dep bilemiz. Kolejdiń 100 jyldyǵynda odan da joǵary jetistikterge jetýlerińizdi tileımiz, - dedi týrnır aldynda sóz alǵan medıaholdıng basshysy.
Jekeleı synda ár kezdesý tartysty ótti. «Vechernıı Almaty» gazetiniń bas redaktor orynbasary Asyl Sagımbekov kolej dırektorynyń orynbasary Jaqsylyq Jurynovty utty.
Almaty Aqshamy basylymynyń bas redaktor orynbasary Esqat Bojan kolejdiń óndiristik oqytý sheberi Málik Eldospen, sondaı-aq «Vechernıı Almaty» aqparat bóliminiń redaktory Rasýl Bahamov dene tárbıesi oqý ornynyń oqytýshysy Syrym Raqyshevpen teń dárejede oınady, degenmen, kolej tenısshileri basym tústi.
Áıelder arasyndaǵy oıyn erekshe qyzyqty ótti. «Vechernıı Almaty» gazetiniń jaýapty hatshysy Irına Týlınova men áleýmettik pedagog Dıana Nurqalı arasyndaǵy kezdesý uzaqqa sozylyp, keıbir partıalar 20 upaıǵa deıin jalǵasty. Bul kezdesýde Irına Týlınova qarsylasynan basym tústi.
Týrnırdiń eń tartysty kezdesýi Erjan Qalymbaıuly men AKTK dırektory Erbol Maǵazov arasynda ótti. Eki oıynshy da joǵary deńgeıdegi sheberlikterin kórsetip, jaqsy oıyn úshin mach sońynda bir-birimen qol alysty.
Týrnırdiń eń tehnıkalyq sheberi bolyp Jánibek Qansarbaev tanyldy.
Juptyq kezdesýlerde Almaty Aqshamy jýrnalısi Ernur Ryspaı men medıaholdıngtiń komersıalyq dırektory Qýanysh Dúskalıev kolejdiń óndiristik oqytý sheberleri Arystanbek Kúzembaev pen Málik Eldosqa qarsy oınady.
Jarys nátıjesi
Jalpykomandalyq esepte AKKK quramasy jeńiske jetti, alaıda týrnırdiń basty maqsaty – dostyq pen yntymaqtastyq boldy. Qatysýshylar bir-birine alǵys aıtyp, taza ári ádil oıyn órnegin kórsetkenderin atap ótti. Jarys sońynda komandalar gramotalar men júldelermen marapattaldy.
Kolejdiń tarıhy men mańyzy
Jarysty qorytyndylaǵan Erbol Maǵazov kolejdiń 95 jyldyq tarıhyna toqtalyp, oqý ornynyń Qazaqstan ekonomıkasyna qosqan úlesin atap ótti.
• 1930 jyly Túrksib qurylysy kezinde temirjol mamandaryna suranys artyp, kolejdiń negizi qalandy.
• Búginde oqý orny 65 myńnan astam bilikti maman daıarlap, olardyń kópshiligi memlekettik organdar men ulttyq kompanıalarda joǵary qyzmetterde jumys isteýde.
• Kolej zamanaýı tehnıkalyq bazamen jabdyqtalǵan jáne qurylys, jóndeý, tasymaldaýdy uıymdastyrý, qozǵalysty basqarý boıynsha mamandar daıarlaıdy.
Týrnır Memleket basshysy jarıalaǵan Jumysshy mamandyqtar jyly aıasynda ótti. Alatau Aqparat pen kolej birneshe jyldan beri yntymaqtastyq ornatyp, sporttyq jarystar uıymdastyryp keledi.
Bul jarys kolejdiń 100 jyldyq mereıtoıyna deıin jańa jetistikterge jetý jolyndaǵy taǵy bir mańyzdy qadam boldy.