Qazaqstanda 173 shıpajaı-kýrortty mekeme jumys isteıdi.
Sońǵy jyldary ishki jáne sheteldik týrıser arasynda saýyqtyrý týrızminiń tanymaldylyǵy artyp keledi, dep habarlaıdy Almaty-akshamy.kz.
Elimizdegi qolaıly klımattyq jaǵdaı, kún sáýlesi, biregeı mıneraldy qaınar kózderi men emdik balshyq oryndary emdeý-saýyqtyrý nysandarynyń damýyna septigin tıgizýde.
Mysaly, ońtústiktegi Saryaǵash shıpajaılary qabyný prosesin emdeýge kómektesetin jáne adam aǵzasynyń jalpy jaǵdaıyna oń áser etetin, sondaı-aq uzaq merzimdi aýrýdan keıin ımýnıtetti qalpyna keltirýge kómektesetin mıneraldy qaınar kózderimen tanymal. Aıta ketý kerek, Saryaǵashtyń Kókterek kenti elimizdegi shıpaıjaılardyń eń kóp shoǵyrlanǵan orny.
Shyǵystaǵy Qaton-Qaraǵaı termaldy radon qaınarlary emdik qasıetteri boıynsha halyqaralyq básekelesterinen kem túspeıdi jáne ártúrli endokrındik aýrýlardy emdeýge kómektesedi. Atalǵan óńirdiń tabıǵaty jazda da, qysta da birdeı ádemi. Bul jergilikti shıpajaı - kýrortty aımaqtarǵa jyldyń kez kelgen ýaqytynda demalýǵa múmkindik beredi.
Al, elimizdiń batysyndaǵy shıpajaılar býyn, júıke júıesin, gınekologıalyq jáne ýrologıalyq patologıalardy, sondaı-aq teri aýrýlaryn emdeýge jáne aldyn alýǵa baǵyttalǵan. Býrabaı jáne Qostanaı qaraǵaıly ormandarynyń ekologıalyq taza aýasy, emdik balshyǵy, ádemi taýly landshaft jáne biregeı tabıǵı kórikti jerler densaýlyǵyn jaqsartqysy keletinder úshin taǵy bir suranysqa ıe shıpajaı-kýrortty aımaqqa aınaldyrdy.
«Qazaqstan saýyqtyrý týrızmin damytý úshin túrli týrısik-rekreasıaly resýrstarǵa ıe. Shıpajaı-kýrortty keshenderdiń kópshiligi jyl boıy jumys isteıdi. Bul maýsymnan tys ýaqytta baǵany tómendetýge múmkindik beredi, sol arqyly demalys pen emdeýdi odan ári qoljetimdi etedi. Keıbir pansıonattar atpen serýendeý, tarıhı jáne tabıǵı kórikti jerlerge ekskýrsıalar júrgizý, ártúrli sporttyq jáne oıyn-saýyq is-sharalaryn uıymdastyrý jáne t.b. birqatar qosymsha qyzmetterdi de usynady»,- dedi Týrızm jáne sport vıse-mınıstri Erjan Erkinbaev.