Mindetterdi iske asyrýdyń negizgi tetikteri pysyqtaldy.
«Qala qurylysy» kodeksin qabyldaý úshin Jol kartasy ázirlenip, bekitildi. Bul týraly Indýstrıa jáne ınfraqurylymdyq damý mınıstri Qaıyrbek Óskenbaev Ortalyq komýnıkasıalar qyzmetiniń alańynda ótken baspasóz máslıhatynda málimdedi, dep habarlaıdy Almaty-akshamy.kz.
Vedomstvo basshysynyń aıtýynsha, Prezıdent halyqqa arnaǵan Joldaýynda mınıstrliktiń aldyna birqatar mańyzdy mindet qoıǵan. Qazirgi ýaqytta atalǵan mindetterdi iske asyrýdyń negizgi tetikterin pysyqtady.
«Birinshiden, «Qala qurylysy» kodeksin qabyldaý úshin jol kartasy ázirlenip, bekitildi. Sonymen birge quqyqtyq jáne taldamalyq monıtorıń júrgizý úshin jumys toby qurylyp, onyń quramyna Qazaq qurylys jáne sáýlet ǵylymı-zertteý jáne jobalaý ınstıtýty, Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy, «QazjolǴZI», «Atameken» ulttyq kásipkerler palatasy jáne bıznes-qoǵamdastyq ókilderi kirdi», - dep atap ótti mınıstr.
Sonymen qatar memlekettik qala qurylysy kadastrynyń aqparattyq júıesi bazasynda árbir iri qala boıynsha jer ýchaskeleriniń fýnksıonaldyq ınteraktıvti kartalaryn jáne komýnaldyq jelilerdiń sqemalaryn qurý josparlanýda.
«Ónerkásiptik maqsattaǵy ýchaskelerdiń kartalary Kólik jáne komýnaldyq ınfraqurylymnyń ózekti sqemalarymen tolyqtyrylatyn bolady. Júıe jergilikti atqarýshy organdar bergen málimetterdi eskersek, 514 myń gektar aýmaqtan ınfraqurylymdyq derekterdiń 65 paıyzyn qamtıdy. Bazaǵa 191 bas jospar jáne 661 egjeı-tegjeıli josparlaý jobasy sıfrlandyrylyp, engizilgen. Jelilerdiń qalǵan 35 paıyzyn 2024 jylǵa deıin sıfrlandyrýdy josparlap otyrmyz», - dedi Qaıyrbek Óskenbaev.