Almatyda Parkınson aýrýyn hırýrgıalyq emdeý ortalyǵy ashylǵanyna - jeti aı.
Sodan bergi aralyqta Prezıdenttiń İs basqarmasyna qarasty klınıkada 28 operasıa sátti jasaldy. Olardyń deni mindetti áleýmettik medısınalyq saqtandyrý aıasynda ótti, dep habarlaıdy Almaty-akshamy.kz QazAqparatqa silteme jasap.
Ortalyq klınıkalyq aýrýhanada kúrdeli otany belgili neırohırýrg, medısına ǵylymdarynyń kandıdaty Shyńǵys Shashkın bastaǵan bilikti úsh dáriger jasaıdy. Sh.Shashkın mı men julynǵa neırostımýlátor ımplanttaýǵa mamandanǵan elimizdegi alǵashqy neırohırýrg.
«Almatyda kvota boıynsha operasıa jasalǵan alǵashqy adamnyń jasy – jetpiste. Ol 8 jyl buryn aýrýdyń asqynǵan túrine shaldyqqan. Qazaqstan boıynsha mundaı aýrýlardyń sany 30 myńǵa jýyqtaıdy, kóbisi egde tartqan adamdar. Degenmen, óz tájirıbemde 25 jastaǵy naýqasty da kórdim», – deıdi dáriger.
Shyńǵys Shashkın operasıanyń qalaı jasalatynyn aıtyp berdi. Ol úshin naýqastyń mıyna jińishke elektrod engizilip, ol buǵana súıeginiń tómengi tusynda teriniń astyna ornatylǵan neırostımýlátorǵa qosylady. Árıne, naýqas operasıadan keıin qulan taza aıyǵyp ketpeıdi. Biraq bulshyqeti istemeı qalǵan jandardyń ómiri aıtarlyqtaı jaqsarady.
Álemde bıostımýlátor salý boıynsha alǵashqy operasıa 1987 jyly jasalǵan. Qazir neırostımýlásıa tásili AQSH-ta, Eýropa men Azıanyń birqatar elinde qoldanylady. Bul ádis Qazaqstanda tuńǵysh ret 2013 jyly tájirıbeden ótkizildi. Sodan beri kúrdeli operasıa Astana men Qaraǵandyda jasalyp kelgen bolatyn.
«Ortalyq klınıkalyq aýrýhana bazasynda Parkınson aýrýyn emdeıtin hırýrgıalyq ortalyqtyń ashylǵany tamasha sheshim boldy. Elimizdegi halyqtyń alpys paıyzdan astamy ońtústik óńirlerde shoǵyrlanǵan. Olardyń osyǵan deıin ózderi turatyn óńirde tegin emdelýge múmkindigi bolmaǵan edi. Qazir tegin otaǵa 29 adam kezekte tur», – deıdi Sh.Shashkın.
Hırýrg Parkınson aýrýynyń aldyn alý úshin salaýatty ómir saltyn saqtap, kóbirek qozǵalyp, durys tamaqtaný kerektigin aıtady.