Qazirgi kezde arnaıy kólissózder júrgizilip jatyr.
Birqatar joǵary oqý orny men kolejderdi megapolısten Qonaev qalasyna kóshirý máselesi qarastyrylyp jatyr. Bul týraly Almaty oblysy ákiminiń orynbasary Arslan Dándibaev óńirdiń bıznes qaýymdastyǵymen kezdesýi barysynda aıtty, dep habarlaıdy Almaty-akshamy.kz.
«Bizdiń oıymyz – ýnıversıtetterdi kóshirý, ol úshin bilim berýdi uıymdastyrý maqsatynda jaqsy kampýstar salý», - dedi Arslan Dándibaev.
Onyń aıtýynsha, stýdentterdiń óndiristik tájirıbeden ótýine jaǵdaı jasalady. Osylaısha, stýdentter jarty kún oqıdy, jarty kún óndiriste jumys isteı alady.
«Bolashaqta biz orta bilim berýdi damytýǵa basa nazar aýdaramyz. Bizde ınjenerler, santehnıkter men sheberlerdi tabý qıyn», - dedi ol.
Oblys basshylyǵy megapolıstegi ómir men baspananyń aımaqqa qaraǵanda áldeqaıda qymbat ekenin eskere otyryp, joǵary oqý oryndary men kolejderdiń óńirge kóshirilýi de oń áleýmettik nátıje beretinine senimdi.