Paıdalanylmaı jatqan 8,1 mln ga jer anyqtaldy.
Qazaqstan Úkimeti paıdalanylmaǵan aýyl sharýashylyǵy jerlerin naqty jumys isteıtinderge berýdi kózdep otyr, dep habarlaıdy Almaty-akshamy.kz ElDala.kz silteme jasap.
Qazaqstanda jaıylymdardyń tapshylyǵy kezinde paıdalanylmaı jatqan 8,1 mln ga jer anyqtaldy. Tekserýden keıin olardyń bir bóligin jer paıdalanýshylary ıgere bastady, al bir bóligi memlekettik menshikke alyndy. Bul týraly QR Premer-Mınıstriniń baspasóz qyzmeti habarlady.
Úkimet janyndaǵy ekonomıkany monopolıasyzdandyrý jónindegi komısıanyń otyrysynda aýyl sharýashylyǵy jerlerin utymdy paıdalaný máselesi talqylandy.
Jyl basynda Qazaqstan Prezıdenti paıdalanylmaıtyn aýyl sharýashylyǵy maqsatyndaǵy jerlerdi májbúrlep alyp qoıý merzimi eki jyldan bir jylǵa deıin qysqartylatyn zańǵa qol qoıdy. Bul rette kosmomonıtorıng arqyly memlekettik baqylaýdyń jańa tetikteri engizildi. Sondaı-aq, paıdalanylmaıtyn aýyl sharýashylyǵy jerlerine salyq mólsherlemeleri eki ese ulǵaıtyldy.
Aýyl sharýashylyǵy mınıstri Erbol Qarashókeev habarlaǵandaı, 2019-2021 jyldary monıtorıń barysynda 8,1 mln ga paıdalanylmaıtyn nemese maqsatqa saı paıdalanylmaıtyn aýyl sharýashylyǵy jerleri anyqtaldy. Áreket etý sharalary qabyldanǵannan keıin, 3,4 mln ga qoldanystaǵy jer paıdalanýshylar ıgere bastady, al 2,1 mln ga memlekettik menshikke qaıtaryldy.
Búgingi tańda 2,6 mln ga jer jergilikti atqarýshy organdardyń qaraýynda.
Sonymen qatar, 2021 jyly aýyl halqynyń mal jaıý úshin jaıylymǵa qajettiligi 21 mln gektardan 14 mln gektarǵa deıin qysqardy, onyń ishinde uıymdasqan sharýashylyqtarmen memorandýmdar jasasý jáne eldi mekenderdiń shekarasyn keńeıtý esebinen.
Premer-Mınıstr Álıhan Smaıylov monıtorıń pen jer paıdalanýshylarmen jumysty jalǵastyrý qajettigine nazar aýdardy.
«Aýyl sharýashylyǵy mınıstrligine jumysty jandandyrýdy tapsyramyn. Paıdalanylmaıtyn aýyl sharýashylyǵy maqsatyndaǵy jerler jer betinde naqty jumys isteıtinderge berilýi tıis», - dedi Álıhan Smaıylov.