«Taza sessiya» aksıasy aıasynda elimizdiń joǵary oqý oryndaryndaǵy sybaılas jemqorlyq tekserildi
Aksıany Amanat partıasynyń Jastar qanaty ótkizdi. 64 joǵary oqý ornynan 20 myńǵa jýyq stýdent anonımdi saýalnamaǵa qatysty, dep habarlaıdy Almaty-akshamy.kz
«Aksıany ótkizýdiń basty sharty – adaldyq pen anonımdik. Sondyqtan men barlyq múddeli tulǵalardy qatysýǵa shaqyramyn. Tek birigý arqyly ǵana biz ýnıversıtetterdegi sybaılas jemqorlyqty joıyp, otandyq bilim berý deńgeıin arttyrýǵa úles qosa alamyz», - dedi Jastar qanatynyń tóraǵasy Nurjan Jetpisbaev aksıa bastalǵan kúni.
Belsendiler joǵary oqý oryndarynyń sany áldeqaıda kóp bolýy múmkin ekenin, biraq bári birdeı «Taza sessiya»-ǵa qatysýǵa kelisimderin bermegenderi týraly aıtty.
«Óńirlerde ýnıversıtetter men kolejder sybaılas jemqorlyqqa toly. Bul - stýdentter men oqytýshylar úshin ádettegi tájirıbe. «Sabaqta otyrǵyńyz kelmeı me? Shokolad alyp ber de, kete ber!». Eń ókinishtisi, stýdentterge bul jaǵdaı unaıdy», - dedi aksıaǵa qatysýshylardyń biri.
Saýalnama júrgizýge táýelsiz baqylaýshylar, sonyń ishinde halyqaralyq grosmeıster Jansaıa Ábdimálik, bloger Almas Saǵynuly jáne ekstremaldy sportshy Sáken Kagarov, basqa da qoǵam qaıratkerleri, sondaı-aq jergilikti atqarýshy organdar janyndaǵy «Adaldyq alańy» jobalyq keńseleriniń ókilderi tartyldy.
Amanat partıasynyń Jastar qanaty aksıanyń qorytyndysyn sáýir aıynyń sońynda jarıalaý josparlanyp otyr.
Esterińizge sala keteıik, «Taza sessiya» aksıasy 8 jyldan beri ótkizilip keledi. Máselen, 2020 jyldyń nátıjeleri boıynsha suralǵandardyń 12,5%-y ózderiniń JOO-da sybaılas jemqorlyq faktileri bar ekenin, bul bir jyl burynǵyǵa qaraǵanda 0,3%-ǵa az ekenin málimdedi.
2020 jyly saýalnamaǵa 20 710 adam qatysty, onyń ishinde 63,3% 2 kýrs jáne odan joǵary stýdentter (46,5% – áıelder, 53,4% – erler). Kóbinese stýdentter sybaılas jemqorlyqpen emtıhan tapsyrý kezinde tap bolǵan, bul týraly aksıaǵa qatysýshylardyń 23,8%-y málimdedi. Sonymen qatar, sol jylǵy reıtıńtiń antılıderi «Astana» medısına ýnıversıteti boldy. Qorytyndy boıynsha, paranyń ortasha mólsheri anyqtalǵan. Máselen, 400 myń teńgege stýdentterge aqyly oqý túrinen búdjettik oqý túrine aýysýdy, 260 myń teńgege áskerı kafedraǵa túsýdi, 150 myń teńgege dıplomdyq jumysty «óte jaqsy» etip qorǵaýdy, al sesıany 22 myń teńgege «avtomatpen» tapsyrýdy usynǵan. Ótken jyly aksıa ýnıversıtetterdiń qashyqtyqtan oqytýǵa kóshýine baılanysty ótkizilgen joq.