Aǵa urpaqqa qamqorlyq jasalyp jatyr.
Aldaǵy ýaqytta Qazaqstanda Belsendi uzaq ómir súrý ortalyqtarynyń sany artýy múmkin. Mundaı ortalyqtarda qart azamattarǵa túrli qyzmet kórsetilip keledi, dep habarlaıdy Almaty-akshamy.kz
«2021 jyly Qazaqstannyń túrli óńirlerinde jumys isteıtin 30 Belsendi uzaq ómir súrý ortalyǵynda qart azamattarǵa 40 myńnan astam túrli qyzmet kórsetildi. Aǵa urpaqqa, ardagerler men zeınetkerlerge qamqorlyq jasaý, qart adamdardyń ómir súrý sapasyn jaqsartý, olardyń bos ýaqytyn júıeli uıymdastyrý, ishki shyǵarmashylyq áleýetin iske asyrý úshin jaǵdaı jasaý, qoǵamdyq ómirge tartý memlekettik saıasattyń basym baǵyttarynyń biri bolyp tabylady», - delingen Eńbekmıni baspasóz qyzmetiniń habarlamasynda.
Belsendi uzaq ómir súrý ortalyqtary «bir tereze» qaǵıdaty boıynsha úsh baǵyt boıynsha jumys isteıdi: belsendi uzaq ómir súrý, densaýlyq mádenıeti jáne jurtshylyqpen baılanys. Ortalyqtardyń qyzmeti qart adamdardyń ómir súrý sapasyn jaqsartýǵa baǵyttalǵan: ónimdi jáne belsendi uzaq ómir súrýge pasıvti ómir súrý mentaldylyǵyn ózgertý, onyń ishinde júıeli bos ýaqytty uıymdastyrý (ıoga, skandınavıalyq júris, IT-saýattylyǵyn arttyrý, motıvasıalyq jáne kásipkerlik kýrstar, aǵylshyn tili kýrstary jáne t.b.).
Ortalyq alǵash ret 2018 jyly Almaty qalasynda ashyldy.
QR Eńbek jáne halyqty áleýmettik qorǵaý mınıstriniń 2021 jylǵy buıryǵymen barlyq óńirlerde belsendi uzaq ómir súrý ortalyqtaryn ashý kózdelgen aǵa býyn azamattarynyń jaǵdaıyn jaqsartý jónindegi 2025 jylǵa deıingi «Belsendi uzaq ómir súrý» is-sharalar jospary bekitildi.
Joǵaryda atalǵan jospardy iske asyrý sheńberinde ótken jyly 15 ortalyq ashyldy, onyń ishinde 2 ortalyq Aqtóbe qalasynda, Qaraǵandy oblysynyń Balqash qalasynda, Túrkistan oblysynyń Arys jáne Jetisaı qalalarynda, Atyraý qalasynda, Nur-Sultan qalasynda, Pavlodar qalasynda, Petropavl qalasynda, Taldyqorǵan qalasynda, Bórli aýdanynda Batys Qazaqstan oblysy, Aqtaý qalasy, Qostanaı oblysy Tobyl qalasy, Semeı qalasy jáne Shyǵys Qazaqstan oblysy Shemonaıha aýdany Pervomaıskıı kenti.
Jergilikti atqarýshy organdardyń aqparaty boıynsha, 2021 jyly belsendi uzaq ómir súrý ortalyqtary boıynsha jobalardy iske asyrýǵa 738 mln.teńgeden astam qarajat jumsaldy, 30 ortalyqqa 385 qyzmetker jumyldyryldy, 40 myńnan astam túrli qyzmet kórsetildi.
Qazirgi ýaqytta respýblıka boıynsha elimizdiń barlyq óńirlerinde belsendi uzaq ómir súrýdiń 37 ortalyǵy jumys isteıdi. Jalpy sanynyń 9-y komýnaldyq memlekettik mekemeler retinde, qalǵandary – úkimettik emes uıymdarda memlekettik áleýmettik tapsyrysty ornalastyrý esebinen ashyldy.
Jergilikti atqarýshy organdardyń aqparaty boıynsha, búgingi kúni ortalyqta qyzmetkerlerdiń jalpy sany 490 adamdy quraıdy, 2022 jyly jergilikti búdjetterden Belsendi uzaq ómir súrý ortalyqtarynyń jobalaryn iske asyrýǵa 1,6 mlrd teńge bólindi.
Sonymen qatar, «Qamqorlyq qory» korporatıvtik qory elimizdiń árbir óńirinde belsendi uzaq ómir súrý ortalyqtaryn ashýdy qosymsha josparlap otyr.