Senat otyrysynan keıin ótken BAQ-qa arnalǵan brıfıń barysynda QR Premer-Mınıstri Álıhan Smaıylov Memleket basshysynyń respýblıkadaǵy ınflásıany eki ese tómendetý týraly tapsyrmasynyń oryndalý barysy týraly aıtyp berdi, dep habarlaıdy almaty-akshamy.kz
Premer-Mınıstr jyldyq ınflásıa aqpan aıynda sharyqtaý shegine jetip, qazan aıynyń qorytyndysy boıynsha 10,8%-ǵa deıin tómendegenin atap ótti.
«Búgingi tańda ınflásıanyń eki ese tómendegenin baıqap otyrmyz. Jyl sońyna deıin onyń deńgeıi 10%-dan tómen bolady dep boljaımyz. Bul Úkimet pen Ulttyq bank júzege asyryp jatqan tıisti sharalar kesheni nátıje bere bastaǵanyn kórsetedi», — dedi Álıhan Smaıylov.
Máselen, turaqtandyrý qorlarynyń qyzmeti qaıta uıymdastyryldy. Aýyl sharýashylyǵy taýaryn óndirýshilerdi qarjylandyrýǵa basymdyq berildi, bul otandyq óndiristi qoldaýǵa, ekonomıkanyń osy sektoryn damytýǵa jáne naryqtaǵy baǵany turaqtandyrýǵa yqpal etti. Sondaı-aq maýsymaralyq kezeńde baǵany turaqtandyrý úshin taýarlyq ıntervensıalar júzege asyrylýda.
Oǵan qosa óńirlik komısıalardyń baqylaý qyzmeti jolǵa qoıyldy. Jalpy myńǵa jýyq deldaldyq sqemalar anyqtaldy.
Sonymen qatar halyqty arzandatylǵan azyq-túlikpen qamtamasyz etý úshin elimizdiń barlyq óńirinde apta saıyn aýyl sharýashylyǵy jármeńkeleri ótkiziledi. Un men áleýmettik nan baǵasynyń ósýin tejeý maqsatynda «Azyq-túlik korporasıasy» qorlarynan óńirlerge arzandatylǵan astyqty jetkizý boıynsha sharalar qabyldanyp jatyr.
Premer-Mınıstr orta merzimdi perspektıvada ınflásıany taǵy 2 esege, ıaǵnı 2026 jyly 5%-ǵa deıin tómendetý jónindegi jumys jalǵasatynyn atap ótti.