2025 jyly Qazaqstanda el ekonomıkasy úshin mańyzdy iri ınvestısıalyq jobalar iske qosylady. Bul týraly Prezıdent Qasym-Jomart Toqaevtyń qatysýymen ótken Úkimettiń keńeıtilgen otyrysynda Premer-mınıstr Oljas Bektenov málimdedi.
Aldaǵy ýaqytta quny $7,4 mlrd bolatyn polıetılen zaýytynyń qurylysy bastalady. Zaýyt munaı hımıasy salasynyń damýyna yqpal etip, eldiń eksporttyq áleýetin arttyrmaq. Sonymen qatar, Qazaqstannyń Damý bankiniń qoldaýymen Pavlodar oblysynda alkılat shyǵaratyn jańa kásiporyn salynady. Bul joba janar-jaǵarmaı óndirisiniń ekologıalyq standarttaryn jaqsartady dep kútilýde.
Kómir hımıasy salasynda da aýqymdy jobalar qolǵa alynýda. «Qarmet» aksıonerlik qoǵamy jylyna 200 myń tonna tas kómir shaıyryn qaıta óńdeıtin jobany júzege asyrýǵa kiristi. Jalpy quny $262 mln bolatyn bul joba kómir hımıasy ónimderiniń 15 túrin shyǵarýdy kózdeıdi.
Sonymen qatar, Qytaıdyń China Energy kompanıasy Qazaqstanǵa $4 mlrd kóleminde ınvestısıa salýǵa nıet bildirip otyr. Qarajat kómirdi tereń óńdeıtin zaýyt salýǵa jumsalmaq. Bul joba ekologıalyq talaptardy saqtaı otyryp, kómir hımıasyn tereń óńdeý arqyly joǵary sapaly ónimder shyǵarýǵa múmkindik beredi.
Munaı jáne kómir hımıasy salasyndaǵy osy jobalar Qazaqstannyń ekonomıkalyq áleýetin arttyryp, óndiristiń ártaraptanýyna jáne jańa jumys oryndarynyń ashylýyna yqpal etpek.