Elimizdiń 20 joǵary oqý ornynyń bazasynda jasandy ıntellekt (JI) boıynsha mamandar daıarlaý baǵdarlamasy iske qosyldy. Bul týraly Prezıdent Qasym-Jomart Toqaevtyń qatysýymen ótken Úkimettiń keńeıtilgen otyrysynda Premer-mınıstr Oljas Bektenov málimdedi.
Premer-mınıstrdiń aıtýynsha, jasandy ıntellekt salasyn damytý «Bolashaq» baǵdarlamasy arqyly da qoldaý tabýda. Bul baǵdarlamanyń aıasynda JI salasyna arnalǵan jeke kvota engizilgen. Sonymen qatar, Astanada Memleket basshysynyń tapsyrmasymen Halyqaralyq jasandy ıntellekt ortalyǵy ashylady.
Elimizde «AI-Sana» baǵdarlamasy iske qosylyp, onyń sheńberinde bıyl 100 myń stýdent ekonomıkanyń ártúrli salalaryna jasandy ıntellekt engizý boıynsha qoldanbaly daǵdylardy meńgermek. Bul bastama stýdentterdiń tájirıbelik bilimin arttyryp, eńbek naryǵynda olardyń suranysyn kóbeıtýge baǵyttalǵan.
Sonymen birge Astana Hub ınovasıalyq ortalyǵy IT salasynda tabysty startaptardy qoldaýǵa jáne damytýǵa arnalǵan tıimdi alańǵa aınaldy. Qazirgi ýaqytta Astana Hub-ta álemniń túrli elderine ónimderin eksporttaıtyn 1,6 myńǵa jýyq IT-kompanıa tirkelgen.
Bul sharalar Qazaqstannyń IT jáne jasandy ıntellekt salasyn damytýdaǵy qarqyndy qadamdaryn kórsetip, eldiń zamanaýı tehnologıalyq ortalyq retinde qalyptasýyna yqpal etpek.