Endi ol 5 qazanda atap ótiledi
Qazaqstanda pedagogtardyń kásibı merekesi – Muǵalimder kúni endi 5 qazanda atap ótiledi. QR Úkimeti tıisti qaýly qabyldady, dep habarlaıdy Almaty-akshamy.kz.
Memlekettik merekeler tizimine sáıkes, respýblıkada Muǵalimder kúni osy ýaqytqa deıin qazan aıynyń birinshi jeksenbisinde toılanyp keldi. Endi bul mereke 5 qazanda álemniń 100-den astam eli atap ótetin Dúnıejúzilik muǵalimder kúnimen sáıkestendirildi.
«Muǵalimder kúni – bilim berý salasyndaǵy qyzmetkerlerdiń barlyǵyna ortaq kásibı mereke. Bul kúni ustazdar qaýymynyń qoǵam damýyndaǵy róli men eńbegi, oǵan qosatyn zor úlesi atalyp ótiledi», - delingen Úkimet basshysynyń baspasóz qyzmeti taratqan habarlamada.
Oqý-aǵartý mınıstrliginiń málimetinshe, búginde Qazaqstanda mektepke deıingi, orta, tehnıkalyq jáne kásiptik bilim berý uıymdarynda 556 myń pedagog eńbek etedi.
Aıta ketsek, Dúnıejúzilik muǵalimder kúnin bekitýge 1966 jyly 5 qazanda Parıjde ótken Muǵalimderdiń mártebesi týraly arnaıy úkimetaralyq konferensıa uıytqy boldy. Nátıjesinde IýNESKO men Halyqaralyq eńbek uıymynyń ókilderi «Muǵalimderdiń mártebesine qatysty usynystar» qujatyna qol qoıdy. Dúnıejúzilik muǵalimder kúni alǵash ret 1994 jyly 5 qazanda atap ótildi.