Turǵyndar óz kúshimen jylyna bir ret joldy jamaıdy
Almaty oblysynyń Qarǵaly aýylyna qarasty "Naýryz" saıajaı qaýymdastyǵynyń turǵyndary 20 jyldan beri aýyl mártebesin ala almaı júr, dep habarlaıdy Almaty-akshamy.kz KTK telearnasyna silteme jasap.
"Naýryz" saıajaılar qaýymdastyǵynda 4 myńnan astam turǵyn bar. Turǵyndar ákimdikke bul jerdi "saıajaı" deý qısynǵa kelmeıtinin aıtqanymen, eshteńe ónbegen. Turǵyndardyń aıtýynsha, aýyl mártebesin berý úshin ákimdik "500 myńnan aqsha jınańdar" degen talap qoıǵan.
"Jer kadastrynda jerge baǵa berip, jer qoǵamdyǵyna saraptama jasaıdy. Bárin 530 myń teńge degen aqshany qurtyp tur. Qarap tursańyz, bul jerdi biz jeke turǵyn úı qurylysy retinde memlekettik akt sıaqty satyp alǵanbyz. Kezinde 5 myń halyqtyń ishinde árqaısysy satyp alǵan aqshaǵa, qolynda satyp alý sharty bar. 530 myń teńgeni ne sebepten surap otyr?" - deıdi saıajaı turǵyny Madına Ysqaqova.
Asfált joq. Turǵyndar óz kúshimen jylyna bir ret joldy jamaıdy. Aýyl retinde tirkelmegendikten, munda áli kúnge mektep joq. Balasyn kórshi aýyldarǵa oqytýǵa májbúr.
"Balalar tórt aýysymmen oqıdy. Eń sońǵysy 21:00-de qaıtady. Qazir túrli jaǵdaı bolyp jatyr, balamyz úshin qorqyp, jolyna shyǵyp kútip turamyz. Baratyn jolda mashına da joq, avtobýs ta joq. Tasyp ákelýge taksı jaldaımyz", - dedi saıajaı turǵyny Kúnsulý Otarbaeva.
Al ákimdik ókili "500 myń teńgeden aqsha jınaý" týraly áńgimeni teriske shyǵardy. Al mektep qurylysy bıyl bastalady deıdi. Al aýyl mártebesin alý úshin ár turǵyn qujatyn jer kadastryna ótkizý kerek eken.
"Birinshi jerdiń baǵalaý quny aktisin jasaý kerek. Ony kadastrda jasaıdy. Ony jasaǵannan keıin aryz berýshi jerdiń ıesi ESQ kiltimen "E lısenzıa" degen baǵdarlama bar, portal bar, egov arqyly beresizder. Sheshim shyǵarý 15 kúnde qaralady ǵoı", - deıdi Qarǵaly aýyl okrýgi ákiminiń orynbasary Qýanysh Batyrbaev.
Turǵyndardyń kóbi ákimdik aıtqan qujattardy osyǵan deıin de ótkizgenin aıtady. Alaıda esh nátıje shyqpaǵan. "Naýryzdyń" óz aldyna aýylǵa aınalý máselesin oblys deńgeıinde qaralǵanyn qalaıdy.