Al eń az mólsherdegi zeınetaqy – 33 858 teńge.
BJZQ Qazaqstan halqynyń zeınetaqy jınaǵy 19 trln teńgege jaqyndaǵanyn málimdedi, dep habarlaıdy Almaty-akshamy.kz
BJZQ aqparaty
2024 jylǵy 1 mamyrdaǵy jaǵdaı boıynsha BJZQ-da salymshylardyń (alýshylardyń) jeke jáne shartty shottarynda shamamen 19 trln teńge jınaqtalǵan. Bir jyl ishinde zeınetaqy jınaqtary 3,3 trln asa teńgege (nemese 21,1%) ósti. Jyl basynan beri 4 aıdyń ishinde olardyń ósimi shamamen 1,12 trln teńge (6,2%) boldy.
– Mindetti zeınetaqy jarnalary (MZJ) esebinen qalyptastyrylǵan zeınetaqy jınaqtary 2024 jylǵy 1 mamyrǵa 18,3 trln teńgeden asyp, bir jylda 20,6% ulǵaıdy. Mindetti kásiptik zeınetaqy jarnalary (MKZJ) esebinen zeınetaqy jınaqtarynyń somasy shamamen 599 mlrd teńge (bir jyldaǵy ósim - 22,8%). Bir jyldaǵy eń úlken ósimdi (45,7%) erikti zeınetaqy jarnalary (EZJ) boıynsha jınaqtar kórsetti. Olardyń kólemi shamamen 6 mlrd teńge, – dep habarlaıdy qordan.
Jınaqtar mólsheriniń ósimi zeınetaqy jarnalary men ınvestısıalyq kiris túrindegi kiris aǵyndary esebinen múmkin boldy. 2024 jyldyń 4 aıynda salymshylardyń shottaryna túsken zeınetaqy jarnalarynyń kólemi - 856,4 mlrd teńge (ótken jyldyń kórsetkishimen salystyrǵanda 29,1% nemese shamamen 193 mlrd teńgege ósken).
Investısıalyq kiris
2024 jylǵy 1 qańtardan bastap salymshylardyń (alýshylardyń) zeınetaqy shottaryna qosymsha qarajat – jumys berýshiniń mindetti zeınetaqy jarnalary (JMZJ) túsýde. 2024 jyldyń 4 aıynda JMZJ esebinen zeınetaqy jınaqtarynyń somasy 57,9 mlrd teńgeden asty.
BJZQ salymshylarynyń jeke jáne shartty zeınetaqy shottaryna eseptelgen taza ınvestısıalyq kiris jyl basynan beri 01.05.2024 j. - 517,6 mlrd. teńge.
BJZQ-dan tólemder men saqtandyrý uıymdaryna aýdarymdar túrindegi shyǵys aǵyndary 2024 jyldyń 4 aıynda shamamen 285,5 mlrd teńge boldy. Bul rette osy kólemniń 41,7%, ıaǵnı 119 mlrd teńgesi - turǵyn úı jaǵdaılaryn jaqsartýǵa jáne emdelýge arnalǵan birjolǵy zeınetaqy tólemderi (BZT). Zeınet jasyna tolýǵa baılanysty tólemder shamamen 67,8 mlrd teńge, bul ótken jylǵy kórsetkishten 19,2 mlrd teńgege (39,5%) kóp. Sondaı-aq, muragerlik boıynsha tólemder – 18,5 mlrd teńge, QR sheginen tys turaqty turýǵa ketýge baılanysty tólemder – 11,4 mlrd teńge, múgedektigi bar adamdarǵa tólemder – 1 mlrd teńgeden astam, jerleýge tólemder - 3,3 mlrd teńge júzege asyryldy. Saqtandyrý uıymdaryna 64,3 mlrd teńgeden astam soma aýdaryldy.
Eń baı zeınetker
Atap keteıik, BJZQ-dan keste boıynsha ortasha aılyq tólem somasy (zeınet jasyna tolýǵa baılanysty) 33 858 teńge, al aı saıynǵy tólemniń eń joǵary somasy - 945 752 teńge. Byltyr BJZQ-dan keste boıynsha aı saıynǵy tólemniń ortasha somasy 32 090 teńge, al aı saıynǵy tólemniń eń joǵary somasy 742 692 teńge bolǵan.