Memleket basshysy Qazaqstan-Sıngapýr rektorlarynyń «Ǵylym men joǵary bilim salasyndaǵy áriptestiktiń jańa shyńy» atty forýmyna qatysty
Qasym-Jomart Toqaev forým qatysýshylaryna iltıpat bildire otyryp, bilim men ǵylymdy damytý elimizdegi memlekettik saıasattyń negizgi basymdyǵy sanalatynyn atap ótti, dep habarlaıdy almaty-akshamy.kz.
– Búgingi forýmnyń eki el yntymaqtastyǵy úshin mańyzy zor. Bul shara Qazaqstan men Sıngapýrdyń bilim jáne ǵylymı-zertteý salalaryndaǵy yqpaldastyǵyn budan da joǵary deńgeıge shyǵarýdy kózdeıdi. Keshe Sıngapýrdyń Prezıdentimen jáne Premer-mınıstrimen ǵylym, bilim, halyqaralyq baılanystar sıaqty ekijaqty yntymaqtastyqtyń keń aýqymdy máseleleri boıynsha óte mazmundy kelissózder júrgizdim. Qazaqstannyń barynsha ashyq, turaqty naryqtyq ekonomıkaǵa kóshýi qarqyndy jáne ornyqty bilim berý standarttary men sıfrlyq transformasıany qajet etedi, – dedi Memleket basshysy.
Qasym-Jomart Toqaev Qazaqstanda sheteldik jetekshi ýnıversıtetterdiń fılıaldaryn ashý, halyqaralyq ınstıtýttarmen birlesip udaıy zertteý jumystaryn júrgizý úshin elimizge dáıekti tásil qajet ekenin aıtty.
– Sońǵy birneshe jylda biz bedeldi 19 ýnıversıtetpen strategıalyq aláns qurdyq. AQSH, Ulybrıtanıa, Reseı jáne Germanıa ýnıversıtetteri elimizde óz fılıaldaryn ashty. Sondaı-aq Qytaı, Túrkıa, Italıa jáne jáne basqa da memleketterdiń ýnıversıtetteri Qazaqstanǵa qyzyǵýshylyq tanytyp otyr, – dedi Prezıdent.