Qazaqstan Respýblıkasynyń Prezıdenti Qasym-Jomart Toqaev QR Memlekettik keńesshisiniń mártebesi men ókilettikterin aıqyndaıtyn Jarlyqqa qol qoıdy.
Qujatqa sáıkes, Qazaqstan Respýblıkasynyń Memlekettik keńesshisin Prezıdent taǵaıyndap, laýazymnan bosata alady. Óziniń qyzmetin Memleket basshysynyń tikeleı basshylyǵymen júzege asyrady, oǵan esep beredi jáne baqylaýynda bolady.
Sondaı-aq Memkeńesshi Prezıdent janyndaǵy konsýltatıvtik-keńesshi organdardyń qyzmetin úılestiredi. Óziniń quzyretine kiretin máseleler boıynsha ortalyq jáne jergilikti atqarýshy organdarǵa tapsyrma berýge; Úkimettiń, Memleket basshysynyń janyndaǵy konsýltatıvtik-keńesshi organdardyń otyrystaryna qatysýǵa; vedomstvoaralyq jumys toptaryn qurýǵa quqyly.
Budan bólek, Parlamentpen, basqa da memlekettik organdarmen, saıası partıalarmen jáne qoǵamdyq birlestiktermen qarym-qatynasta, halyqaralyq qarym-qatynastarda ókildik etedi. Áleýmettik-gýmanıtarıa salasy: bilim, ǵylym, mádenıet jáne sport máseleleri boıynsha qyzmetti úılestiredi.
Jarlyq mátinin tolyq jarıalaımyz
* * *
Qazaqstan Respýblıkasy Memlekettik keńesshisiniń mártebesi men ókilettikteri, Qazaqstan Respýblıkasy Prezıdentiniń keıbir jarlyqtaryna ózgerister engizý jáne Qazaqstan Respýblıkasy Prezıdentiniń keıbir jarlyqtaryn kúshi joıyldy dep taný týraly
Qazaqstan Respýblıkasy Konstıtýsıasynyń 44-babynyń 19) tarmaqshasyna sáıkes QAÝLY ETEMİN:
1. Qazaqstan Respýblıkasynyń Memlekettik keńesshisi (budan ári – Memlekettik keńesshi) Qazaqstan Respýblıkasynyń Prezıdenti laýazymǵa taǵaıyndaıtyn jáne laýazymnan bosatatyn Qazaqstan Respýblıkasynyń laýazymdy adamy bolyp tabylady.
2. Memlekettik keńesshi óziniń qyzmetin Qazaqstan Respýblıkasy Prezıdentiniń tikeleı basshylyǵymen júzege asyrady, oǵan esep beredi jáne baqylaýynda bolady.
3. Memlekettik keńesshi qyzmetiniń quqyqtyq negizin Qazaqstan Respýblıkasynyń Konstıtýsıasy, zańdary, osy Jarlyq jáne Qazaqstan Respýblıkasy Prezıdentiniń ózge de aktileri quraıdy.
4. Memlekettik keńesshi mynadaı ókilettikterdi júzege asyrady:
1) Qazaqstan Respýblıkasynyń Prezıdentine ishki saıasat salasy boıynsha strategıalyq usynystardy tujyrymdaıdy;
2) Memleket basshysynyń tapsyrmasyna sáıkes: Qazaqstan Respýblıkasynyń Parlamentimen jáne onyń Palatalarymen, basqa da memlekettik organdarmen, saıası partıalarmen jáne qoǵamdyq birlestiktermen qarym-qatynastarda; halyqaralyq qarym-qatynastarda ókildik etedi;
3) mynalardy: áleýmettik-gýmanıtarlyq sala: bilim, ǵylym, mádenıet jáne sport máseleleri boıynsha qyzmetti úılestiredi; Memleket basshysynyń janyndaǵy konsýltatıvtik-keńesshi organdardyń: Sybaılas jemqorlyqqa qarsy is-qımyl máseleleri jónindegi komısıanyń; Memlekettik nagradalar jónindegi komısıanyń; Azamattyq máseleleri jónindegi komısıanyń; Memlekettik rámizder men vedimistik jáne olarǵa teńestirilgen ózge de nagradalar geraldıkasy jónindegi respýblıkalyq komısıanyń; Shetelde kadrlar daıarlaý jónindegi respýblıkalyq komısıanyń; Qazaqstan Respýblıkasynyń ál-Farabı atyndaǵy ǵylym men tehnıka salasyndaǵy memlekettik syılyǵyn berý jónindegi komısıanyń; Qazaqstan Respýblıkasynyń Abaı atyndaǵy ádebıet pen óner salasyndaǵy memlekettik syılyǵyn berý jónindegi komısıanyń; Qoǵamdyq sanany jańǵyrtý baǵdarlamasyn iske asyrý jónindegi ulttyq komısıanyń; Saıası qýǵyn-súrgin qurbandaryn tolyq aqtaý jónindegi memlekettik komısıanyń; Ulttyq quryltaıdyń jáne Jastar saıasaty jónindegi keńestiń qyzmetin úılestiredi;
4) Qazaqstan Respýblıkasy Prezıdentiniń janyndaǵy Qazaqstannyń strategıalyq zertteýler ınstıtýtynyń qyzmetine jetekshilik etedi, qoǵamdyq damý salasyndaǵy memlekettik taldamalyq qurylymdardyń jumysyn úılestiredi;
5) «Táýelsizdik urpaqtary» grantyn taǵaıyndaý jónindegi jumysty úılestiredi;
6) Qazaqstan Respýblıkasy Prezıdentiniń tapsyrmalaryna sáıkes ózge de ókilettikterdi júzege asyrady.
5. Osy Jarlyqta belgilengen ókilettikterdi iske asyrý maqsatynda Memlekettik keńesshi:
1) ókimder shyǵarýǵa;
2) óziniń quzyretine kiretin máseleler boıynsha ortalyq jáne jergilikti atqarýshy organdarǵa tapsyrmalar berýge;
3) Qazaqstan Respýblıkasy Úkimetiniń, Memleket basshysynyń janyndaǵy konsýltatıvtik-keńesshi organdardyń otyrystaryna qatysýǵa;
4) óziniń quzyretine kiretin máseleler boıynsha memlekettik organdar men laýazymdy adamdardan qajetti aqparatty, qujattar men basqa da materıaldardy suratýǵa jáne alýǵa;
5) óziniń quzyretine kiretin máseleler boıynsha Qazaqstan Respýblıkasynyń Prezıdenti aktileriniń jobalaryn ázirleý, sondaı-aq Memleket basshysy alǵa qoıǵan ózge de mindetterdi sheshý úshin vedomstvoaralyq jumys toptaryn qurýǵa quqyly.
6. Memlekettik keńesshiniń qyzmetin uıymdyq-quqyqtyq, aqparattyq-taldamalyq jáne ózgedeı qamtamasyz etýdi Qazaqstan Respýblıkasy Prezıdentiniń Ákimshiligi júzege asyrady.
7. Qosa berilip otyrǵan Qazaqstan Respýblıkasy Prezıdentiniń keıbir jarlyqtaryna engiziletin ózgerister bekitilsin.
8. Qazaqstan Respýblıkasynyń Úkimeti, Qazaqstan Respýblıkasy Prezıdentiniń Ákimshiligi, Qazaqstan Respýblıkasy Prezıdentiniń İs basqarmasy osy Jarlyqtan týyndaıtyn sharalardy belgilengen tártippen qabyldasyn.
9. Osy Jarlyqqa qosymshaǵa sáıkes Qazaqstan Respýblıkasy Prezıdentiniń keıbir jarlyqtarynyń kúshi joıyldy dep tanylsyn.
10. Osy Jarlyq qol qoıylǵan kúninen bastap qoldanysqa engiziledi.
Qazaqstan Respýblıkasynyń
Prezıdenti Q.Toqaev
Nur-Sultan, Aqorda, 2022 jylǵy 14 maýsym
№ 927
Qazaqstan Respýblıkasy
Prezıdentiniń
2022 jylǵy 14 maýsymdaǵy
№ 927 Jarlyǵymen
BEKİTİLGEN
Qazaqstan Respýblıkasy Prezıdentiniń
keıbir jarlyqtaryna engiziletin
ÓZGERİSTER
1. «Qazaqstan Respýblıkasynyń Memlekettik protokolyn bekitý týraly» Qazaqstan Respýblıkasy Prezıdentiniń 2006 jylǵy 12 qazandaǵy № 201 Jarlyǵynda: joǵaryda atalǵan Jarlyqpen bekitilgen Qazaqstan Respýblıkasynyń Memlekettik protokolynda:
98-tarmaq mynadaı redaksıada jazylsyn:
«98. Sondaı-aq ulyqtaý rásimine Qazaqstan Respýblıkasynyń Premer-Mınıstri, Qazaqstan Respýblıkasynyń Memlekettik keńesshisi jáne Prezıdent Ákimshiliginiń Basshysy, Úkimet músheleri, Qazaqstan Respýblıkasynyń ózge de ortalyq memlekettik organdarynyń basshylary, oblystardyń, respýblıkalyq mańyzy bar qalalardyń jáne astananyń ákimderi, shet memleketter men úkimetterdiń basshylary, Qazaqstanda akkredıttelgen dıplomatıalyq korpýstyń ókilderi, qazaqstandyq jáne halyqaralyq jurtshylyqtyń, otandyq jáne sheteldik BAQ-tyń ókilderi qatysýǵa quqyly.»;
15-taraýdyń taqyrybyndaǵy «hatshylarynyń» degen sóz «keńesshileriniń» degen sózben aýystyrylsyn;
15-taraýdyń 2-paragrafynyń taqyrybyndaǵy «hatshylarynyń» degen sóz «keńesshileriniń» degen sózben aýystyrylsyn;
156, 157 jáne 159-tarmaqtar mynadaı redaksıada jazylsyn:
«156. Memlekettik keńesshilerdiń qatysýymen ótetin hattamalyq is-sharalar shet memlekettiń memlekettik qurylysyndaǵy memlekettik keńesshiniń mártebesine baılanysty ótkiziledi. 157. Qazaqstan Respýblıkasy Memlekettik keńesshisiniń shaqyrýy boıynsha keletin shet memleketter memlekettik keńesshileriniń saparlary Qazaqstan Respýblıkasy Memlekettik keńesshisiniń hatshylyǵynda bekitilgen baǵdarlama negizinde júzege asyrylady.»;
«159. Sapardyń is-sharalaryna qatysatyn Qazaqstan Respýblıkasynyń resmı tulǵalarynyń quramyn Syrtqy ister mınıstrliginiń usynysy boıynsha Qazaqstan Respýblıkasy Memlekettik keńesshisiniń hatshylyǵy aıqyndaıdy.»;
16-taraýdyń taqyrybyndaǵy «hatshysynyń» degen sóz «keńesshiniń» degen sózben aýystyrylsyn;
178, 204, 207, 208 jáne 209-tarmaqtar mynadaı redaksıada jazylsyn:
«178. Qazaqstan Respýblıkasynyń Memlekettik keńesshisi shet elge/shet elden shyqqan (kelgen) kezde áýejaıda shyǵaryp salýǵa (qarsy alýǵa) Qazaqstan Respýblıkasynyń Memlekettik keńesshisi hatshylyǵynyń tıisti qyzmetkeri qatysady.
Sapar baǵdarlamasy Syrtqy ister mınıstrligimen birlesip jasalady.
Qazaqstan Respýblıkasy Memlekettik keńesshisiniń el ishindegi jumys saparlary kezinde Nur-Sultan qalasynda jáne jergilikti jerlerde shyǵaryp salý (qarsy alý), bolý baǵdarlamasyn jasaý sıaqty birqatar protokoldyq is-sharalardy júrgizý jáne qamtamasyz etý kózdeledi.
Qazaqstan Respýblıkasynyń Memlekettik keńesshisi jumys saparlaryna (jumys saparlarynan) shyqqan (kelgen) kezde áýejaıda shyǵaryp salýǵa (qarsy alýǵa) Qazaqstan Respýblıkasynyń Memlekettik keńesshisi hatshylyǵynyń tıisti qyzmetkeri qatysady. Jergilikti jerlerde oblys ákimi jáne oblystyq mańyzy bar qala ákimi qarsy alady (shyǵaryp salady).
Qazaqstan Respýblıkasynyń Memlekettik keńesshisi qatysatyn is-sharalardy, onyń ishinde shet memleketter ókilderimen jumys babyndaǵy kezdesýler men áńgimelesýlerdi Qazaqstan Respýblıkasy Memlekettik keńesshisiniń hatshylyǵy belgilengen tártippen josparlaıdy, kelisedi jáne qamtamasyz etedi.»;
«204. Qazaqstan Respýblıkasynyń Memlekettik keńesshisine senim gramotalaryn tapsyrý kezinde shet memleketterdiń Qazaqstan Respýblıkasynda qosa atqarýshy bolyp akkredıttelgen elshileri Syrtqy ister mınıstrliginiń Memlekettik protokol qyzmetiniń qyzmetkerlerimen birge agreman berilgen kúnine sáıkes kezekpen Prezıdent Saraıynyń ortalyq kireberisine keledi.»;
«207. Memlekettik keńesshi «Órnekti holǵa» kiredi jáne ortaǵa kelip toqtaıdy. Shet memlekettiń elshisi zaldyń ortasyna bet alady jáne Memlekettik keńesshiniń qarsy aldyna kelip toqtaıdy, qysqasha sálemdesedi jáne senim gramotalaryn tapsyrady. Qol alysady jáne sýretke túsedi.»;
«208. Senim gramotalaryn tapsyrǵannan keıin Memlekettik keńesshi men shet memlekettiń Elshisi qysqasha ángimelesý úshin qonaqtar bólmesine ótedi.
209. Rásimge Syrtqy ister mınıstriniń orynbasary jáne Qazaqstan Respýblıkasynyń Memlekettik keńesshisi hatshylyǵynyń tıisti qyzmetkeri qatysady.»;
atalǵan Jarlyqpen bekitilgen Qazaqstan Respýblıkasynyń Memlekettik protokolyna 1-qosymshada:
5-tarmaq mynadaı redaksıada jazylsyn:
«5. Memlekettik keńesshi»;
atalǵan Jarlyqpen bekitilgen Qazaqstan Respýblıkasynyń Memlekettik protokolyna 2-qosymshada: 5-tarmaq mynadaı redaksıada jazylsyn:
«5. Memlekettik keńesshi».
2. «Qazaqstan Respýblıkasy Prezıdenti Ákimshiliginiń shtat sany men qurylymy týraly» Qazaqstan Respýblıkasy Prezıdentiniń 2008 jylǵy 11 aqpandaǵy № 533 Jarlyǵynda:
joǵaryda atalǵan Jarlyqpen bekitilgen Qazaqstan Respýblıkasy Prezıdenti Ákimshiliginiń qurylymynda:
«Memlekettik hatshynyń hatshylyǵy» degen jol mynadaı redaksıada jazylsyn:
«Memlekettik keńesshiniń hatshylyǵy».
3. «Qazaqstan Respýblıkasy Prezıdentiniń Ákimshiligi týraly erejeni bekitý týraly» Qazaqstan Respýblıkasy Prezıdentiniń 2008 jylǵy 11 naýryzdaǵy
№ 552 Jarlyǵynda: joǵaryda atalǵan Jarlyqpen bekitilgen Qazaqstan Respýblıkasy Prezıdentiniń Ákimshiligi týraly erejede:
9-tarmaqtyń 2) tarmaqshasy mynadaı redaksıada jazylsyn:
«2) Qazaqstan Respýblıkasy Memlekettik keńesshisiniń (budan ári – Memlekettik keńesshi), Qazaqstan halqy Assambleıasynyń jáne Prezıdent janyndaǵy konsýltatıvtik-keńesshi organdardyń qyzmetin qamtamasyz etý;»;
22-tarmaqta: 8) jáne 15) tarmaqshalardaǵy «hatshynyń» degen sóz «keńesshiniń» degen sózben aýystyrylsyn.
4. «Qazaqstan Respýblıkasy Prezıdentiniń joldaýyn daıyndaý jáne iske asyrý, aktilerimen jáne tapsyrmalarymen jumys isteý jáne olardyń oryndalýyn baqylaýdy júzege asyrý, normatıvtik quqyqtyq jarlyqtarǵa monıtorıń júrgizý qaǵıdalaryn bekitý týraly» Qazaqstan Respýblıkasy Prezıdentiniń 2010 jylǵy 27 sáýirdegi № 976 Jarlyǵynda:
joǵaryda atalǵan Jarlyqpen bekitilgen Qazaqstan Respýblıkasy Prezıdentiniń joldaýyn daıyndaý jáne iske asyrý, aktilerimen jáne tapsyrmalarymen jumys isteý jáne olardyń oryndalýyn baqylaýdy júzege asyrý, normatıvtik quqyqtyq jarlyqtarǵa monıtorıń júrgizý qaǵıdalarynda:
24-tarmaqtyń besinshi bóligi mynadaı redaksıada jazylsyn:
«Qajet bolǵan kezde Prezıdent aktisiniń jobasyna Qazaqstan Respýblıkasynyń Memlekettik keńesshisi, Prezıdenttiń keńesshisi elektrondyq túrde vıza qoıady.»; 71 jáne 78-tarmaqtar mynadaı redaksıada jazylsyn:
«71. Osy Qaǵıdalardyń 42-tarmaǵynyń 5) tarmaqshasynda kórsetilgen qyzmettik jáne ózge de qujattar boıynsha Prezıdenttiń Qazaqstan Respýblıkasynyń Memlekettik keńesshisine jeke berilgen jáne Prezıdentti jeke habardar etýdi talap etpeıtin tapsyrmalarynyń oryndalý merzimderin uzartý, orta merzimdi jáne uzaq merzimdi baqylaýǵa aýystyrý, jańa oryndaý merzimin belgileý Qazaqstan Respýblıkasy Memlekettik keńesshisiniń sheshimimen júzege asyrylýy múmkin.»;
«78. Osy Qaǵıdalardyń 42-tarmaǵynyń 5) tarmaqshasynda kórsetilgen qyzmettik jáne ózge de qujattar boıynsha Prezıdenttiń Qazaqstan Respýblıkasynyń Memlekettik keńesshisine jeke berilgen jáne Prezıdentti jeke habardar etýdi talap etpeıtin tapsyrmalaryn baqylaýdan alý Qazaqstan Respýblıkasy Memlekettik keńesshisiniń sheshimimen júzege asyrylýy múmkin.».
5. «Memlekettik saıası jáne ákimshilik qyzmetshiler laýazymdarynyń tizilimin bekitý týraly» Qazaqstan Respýblıkasy Prezıdentiniń 2015 jylǵy 29 jeltoqsandaǵy № 150 Jarlyǵynda:
joǵaryda atalǵan Jarlyqpen bekitilgen Memlekettik saıası jáne ákimshilik qyzmetshiler laýazymdarynyń tiziliminde: «1-taraý. Memlekettik saıası laýazymdar» degen taraýda: «Qazaqstan Respýblıkasynyń Memlekettik hatshysy» degen jol mynadaı redaksıada jazylsyn: «Qazaqstan Respýblıkasynyń Memlekettik keńesshisi».
6. «Memlekettik saıası qyzmetshilerdiń jumysyn baǵalaýdy júrgizetin ýákiletti adamdardyń tizbesin bekitý týraly» Qazaqstan Respýblıkasy Prezıdentiniń 2016 jylǵy 4 shildedegi № 295 Jarlyǵynda:
joǵaryda atalǵan Jarlyqpen bekitilgen Memlekettik saıası qyzmetshilerdiń jumysyn baǵalaýdy júrgizetin ýákiletti adamdardyń tizbesinde: myna jol: « Qazaqstan Respýblıkasynyń Memlekettik hatshysy Qazaqstan Respýblıkasynyń Prezıdenti » mynadaı redaksıada jazylsyn: « Qazaqstan Respýblıkasynyń Memlekettik keńesshisi Qazaqstan Respýblıkasynyń Prezıdenti».
Qazaqstan Respýblıkasy Prezıdentiniń 2022 jylǵy 14 maýsymdaǵy № 927 Jarlyǵyna
QOSYMSHA Qazaqstan Respýblıkasy Prezıdentiniń
kúshi joıylǵan keıbir jarlyqtarynyń
TİZBESİ
1. «Qazaqstan Respýblıkasy Memlekettik hatshysynyń mártebesi men ókilettikteri týraly» Qazaqstan Respýblıkasy Prezıdentiniń 2007 jylǵy 13 tamyzdaǵy № 379 Jarlyǵy.
2. «Qazaqstan Respýblıkasy Prezıdentiniń keıbir aktilerine ózgerister engizý týraly» Qazaqstan Respýblıkasy Prezıdentiniń 2014 jylǵy 18 sáýirdegi № 806 Jarlyǵynyń 1-tarmaǵynyń 2) tarmaqshasy.
3. Qazaqstan Respýblıkasy Prezıdentiniń 2014 jylǵy 18 qarashadaǵy № 960 Jarlyǵymen bekitilgen Qazaqstan Respýblıkasy Prezıdentiniń keıbir aktilerine engiziletin ózgeristerdiń 3-tarmaǵy.
4. Qazaqstan Respýblıkasy Prezıdentiniń 2017 jylǵy 5 mamyrdaǵy № 471 Jarlyǵymen bekitilgen Qazaqstan Respýblıkasy Prezıdentiniń keıbir aktilerine engiziletin ózgerister men tolyqtyrýlardyń 1-tarmaǵy.
5. «Qazaqstan Respýblıkasy Memlekettik hatshysynyń mártebesi men ókilettikteri týraly» Qazaqstan Respýblıkasy Prezıdentiniń 2007 jylǵy 13 tamyzdaǵy № 379 Jarlyǵyna ózgeris pen tolyqtyrý engizý týraly» Qazaqstan Respýblıkasy Prezıdentiniń 2019 jylǵy 13 sáýirdegi № 23 Jarlyǵy.
6. «Qazaqstan Respýblıkasy Prezıdentiniń keıbir jarlyqtaryna ózgerister engizý týraly» Qazaqstan Respýblıkasy Prezıdentiniń 2019 jylǵy 12 qazandaǵy № 187 Jarlyǵy.
7. «Qazaqstan Respýblıkasy Memlekettik hatshysynyń mártebesi men ókilettikteri týraly» Qazaqstan Respýblıkasy Prezıdentiniń 2007 jylǵy 13 tamyzdaǵy № 379 Jarlyǵyna ózgeris engizý týraly» Qazaqstan Respýblıkasy Prezıdentiniń 2022 jylǵy 25 qańtardaǵy № 787 Jarlyǵy.