Osy arqyly 10 myńǵa jýyq ótinim qaraldy.
Múgedektik tobyn belgileý úshin medısınalyq-áleýmettik saraptama júrgizýdiń syrttaı formaty boıynsha pılottyq jobany iske asyrý sheńberinde aǵymdaǵy jylǵy 11 naýryzdaǵy jaǵdaı boıynsha, Qazaqstannyń barlyq óńirlerinen 9 609 ótinim qaraldy. Qazirgi ýaqytta jobaǵa 487 medısınalyq uıym qosylǵan, dep habarlaıdy Almaty-akshamy.kz.
«Buǵan deıin habarlanǵandaı, Ulttyq qoǵamdyq senim keńesiniń VI otyrysynda Memleket basshysy erekshe qajettilikteri bar adamdar úshin barynsha qolaıly jaǵdaı jasaýdy, olardyń ınstansıalar men qaǵazbastylyq boıynsha júrýin, sondaı-aq qyzmet kórsetýshilerdiń qyzmet alýshylarmen baılanysyn boldyrmaýdy tapsyrdy»,- delingen Eńbekmıni baspasóz qyzmetiniń habarlamasynda.
Osy tapsyrmany iske asyrý sheńberinde QR Eńbek jáne halyqty áleýmettik qorǵaý mınıstrligi Densaýlyq saqtaý men Sıfrlyq damý, ınovasıalar jáne aeroǵarysh ónerkásibi mınıstrlikterimen birlesip, Qazaqstannyń barlyq 17 óńirinde pılottyq rejımde medısınalyq-áleýmettik saraptama júrgizýdiń syrttaı formaty boıynsha jobany iske qosty.
Múgedektik tobyn belgileý boıynsha qyzmet alý úshin ótinish berýshi tek turǵylyqty jeri boıynsha emhanaǵa baryp, qajetti tekserýden ótýi kerek, al qalǵan prosester aqparattyq júıelerdi ıntegrasıalaý esebinen onyń qatysýynsyz ótedi.
«Buryn densaýlyǵynan aıyrylǵan azamattarǵa múgedektikti belgileý jáne tehnıkalyq quraldar men ońaltý qyzmetterin alý úshin ártúrli ınstansıalarǵa júginýge týra keletin. Máselen, aldymen tekserilý úshin emhanaǵa, sodan keıin múgedektikti anyqtaý úshin medısınalyq-áleýmettik saraptama bólimine, sodan soń múgedektik belgilengennen keıin járdemaqy taǵaıyndaý úshin «Azamattarǵa arnalǵan úkimet» memlekettik korporasıasy» KEAQ-ta jáne OTQ men ońaltý qyzmetterin alý úshin ákimdikke júginýge májbúr bolatyn. Sodan keıin keıde birneshe aıǵa sozylǵan memlekettik satyp alý rásimderi ótkiziledi. Osylaısha, azamattar tehnıkalyq quraldar men qyzmetterdi ýaqtyly ala almady, sondaı-aq olardyń sapasyna árdaıym qanaǵattanbady.
Endi pılottyq jobany iske asyrý sheńberinde ótinish berýshi tek turǵylyqty jeri boıynsha emhanaǵa júginedi, al medısınalyq-áleýmettik saraptama emhanadaǵy dárigerlerdiń qorytyndysy negizinde onyń qatysýynsyz qashyqtyqtan júrgiziledi. Járdemaqy múgedektik toby belgilengennen keıin avtomatty túrde taǵaıyndalady. OTQ jáne ońaltý qyzmetteri 2021 jyldan bastap Áleýmettik qyzmetter portaly arqyly óz betinshe tańdaı alady jáne tapsyrys bere alady, al memleket olardyń qunyn óteıdi. Portaldyń arqasynda kezektilik prosesteri aıqyn boldy, keıbir jaǵdaılarda taýarlar men qyzmetterdi usyný merzimi jarty jyldan 2 aptaǵa deıin qysqardy», – dep atap ótti QR Eńbek jáne halyqty áleýmettik qorǵaý vıse-mınıstri Erbol Ospanov.