Azyq daıyndaý jumystaryn úılestirý úshin Aýyl sharýashylyǵy mınıstrliginiń janynan respýblıkalyq jedel shtab quryldy.
Qazaqstan úkimeti ústimizdegi jyly mal azyǵyn daıyndaý jumystaryna erekshe nazar aýdaryp otyr. Barlyq oblystarda aldaǵy qysqa arnalǵan tórt túlik malǵa jem daıyndaý josparlary anyqtaldy, dep habarlaıdy Almaty-akshamy.kz.
«Bıyl aýa raıynyń qolaısyzdyǵyna baılanysty Atyraý, Qyzylorda, Mańǵystaý, Túrkistan jáne ishinara Almaty oblystarynda maldy azyqpen qamtamasyz etý jaǵdaıy qıyndady. Qurǵaqshylyq saldarynan Mańǵystaý oblysynda jáne Qyzylorda oblysynyń Aral aýdanynda mal ólimi tirkeldi. Mańǵystaý oblysy boıynsha 1 147 aýyl sharýashylyǵy janýary nemese oblystyń jalpy mal basynyń 0,13%-y, Qyzylorda oblysy boıynsha - 492 bas nemese oblystyń aýyl sharýashylyǵy janýarynyń jalpy mal basynyń 0,03%-y óldi»,– delingen Aýyl sharýashylyǵy mınıstrliginiń baspasóz-qyzmetiniń habarlamasynda .
QR Aýyl sharýashylyǵy mınıstrligi janynan jem-shóp daıyndaý máseleleri boıynsha jergilikti atqarýshy organdardyń is-qımylyn úılestirý úshin respýblıkalyq jedel shtab quryldy. Shtab otyrysy únemi ótkizilip turady. Oblys ákimdikteriniń janynan da azyq daıyndaý máselelerin turaqty túrde monıtorıńileý jáne jedel sheshý úshin jedel shtabtar quryldy. Barlyq oblystarda aldaǵy qysqa arnalǵan aýyl sharýashylyǵy maldaryna jem daıyndaý josparlary anyqtaldy.
Qurǵaqshylyqtan zardap shekken óńirlerdiń fermerleri úshin mal jaıýǵa jaıylymdar berý jáne shóp shabýdy uıymdastyrý boıynsha óńiraralyq ózara is-qımyl uıymdastyrylýda.
Shóp shabý úshin paıdalanylmaıtyn jáne jaıylmaly shalǵyndardy bólý boıynsha jumystar júrgizilýde. Halyqqa orman sharýashylyǵy aýmaqtarynda jáne tabıǵı rezervattarda shóp daıyndaý múmkindigi beriledi, aýyl turǵyndaryna egin jınaý jumystarynan keıin alqaptardan saban jınaý múmkindigi beriledi.
Oblys ákimdikteriniń jedel derekterine sáıkes, 2021 jylǵy 7 shildedegi jaǵdaı boıynsha óńirler 6,5 mln tonna shóp daıyndalǵan.
Mańǵystaý oblysyna 13 myń túp jáne 92 oram shóp ákelindi, apta saıyn 5 vagon kebek jetkizilýde. Kórshiles oblystar aýmaǵynda shóp shabý uıymdastyryldy. Basqa óńirlerge ýaqytsha 6 470 bas mal tasymaldandy. Azyq-túlik kelisimshart korporasıasy 637 tonna arzandatylǵan arpa jetkizdi. Azyq daıyndaýdy júzege asyrý úshin QR Úkimetiniń rezervinen 1,9 mlrd.teńge bólinedi.
Aral aýdanyna 1 myń tonnadan astam shóp jáne 40 tonna qunarly jem jetkizildi. Azyq-túlik kelisimshart korporasıasy 600 tonna arpa jetkizedi. 12 shabyndyq brıgada qurylyp, jem-shóp tasýǵa 127 avtomashına jumyldyryldy. Kórshiles Aqtóbe oblysynan iri jem-shóp jetkizý uıymdastyryldy.
Mal azyǵyn daıyndaý jáne qamtamasyz etý máseleleri aýyl sharýashylyǵy mınıstrligi men oblys ákimdikteriniń turaqty baqylaýynda.